Naxçıvan Muxtar Respublikası son illərdə Azərbaycanın sosial-iqtisadi inkişaf gündəliyində yeni mərhələyə qədəm qoyub. Prezident İlham Əliyevin Naxçıvana səfəri zamanı görülən işlərlə yerində tanış olması, yeni layihələrin təməlini qoyması və Azərbaycan Televiziyasına müsahibəsində Naxçıvanın gələcəyi ilə bağlı səsləndirdiyi fikirlər bu inkişaf mərhələsinin həm miqyasını, həm də qarşıdakı dövr üçün əsas istiqamətlərini göstərir. Son illərdə qəbul edilən qərarlar və həyata keçirilən layihələrə nəzər saldıqda Naxçıvanın inkişafına kompleks yanaşmanın olduğu aydın görünür. Dövlətimizin başçısının Naxçıvana 17 dəfə səfər etməsi də muxtar respublikanın inkişaf məsələlərinin daim yüksək səviyyədə diqqətdə saxlanıldığını göstərən mühüm məqamlardandır.
Bu fikirləri AZƏRTAC-a açıqlamasında siyasi şərhçi Ülviyyə Zülfiqar deyib.
O bildirib ki, bu yanaşmanın əsas xüsusiyyətlərindən biri Naxçıvanın mövcud iqtisadi potensialının daha səmərəli şəkildə gücləndirilməsidir. 2023-2027-ci illər üçün Dövlət Proqramının icrası çərçivəsində sahibkarlığın təşviqi, yeni istehsal və xidmət sahələrinin yaradılması, investisiya fəallığının artırılması istiqamətində görülən işlər artıq konkret nəticələr verir. “2023-cü ildən 2026-cı ilin birinci yarısınadək muxtar respublikada 359 istehsal və xidmət sahəsinin yaradılması, 342 sahibkarlıq layihəsinə 27,2 milyon manat güzəştli kreditin verilməsi bunun göstəricisidir. Eyni dövrdə əsas kapitala investisiyaların əhəmiyyətli dərəcədə artması Naxçıvanda iqtisadi fəallığın genişləndiyini göstərir. Prezident İlham Əliyevin müsahibəsində iqtisadi inkişaf və özəl sektorun imkanlarına xüsusi diqqət çəkməsi qarşıdakı mərhələdə bu dinamikanın daha da gücləndirilməsinin əsas hədəflərdən biri olduğunu göstərir. Sahibkarlığın inkişafı, yeni istehsal sahələrinin yaradılması və investisiya imkanlarının genişləndirilməsi Naxçıvanın iqtisadi potensialının daha dolğun reallaşdırılması baxımından mühüm əhəmiyyət daşıyır. Naxçıvanın inkişafında diqqət çəkən digər mühüm məqam infrastruktur layihələrinin iqtisadi inkişafla paralel şəkildə həyata keçirilməsidir. Enerji və su təminatının müasirləşdirilməsi, yol infrastrukturunun yenilənməsi, yeni sosial obyektlərin yaradılması muxtar respublikanın uzunmüddətli inkişafı üçün zəruri bazanı formalaşdırır. İğdır–Naxçıvan təbii qaz boru kəmərinin istifadəyə verilməsi, yeni elektrik stansiyalarının tikintisi və elektrik şəbəkəsinin yenidən qurulması enerji təhlükəsizliyinin daha da möhkəmləndirilməsinə xidmət edir. Su ehtiyatlarının idarə olunması ilə bağlı 2026-2030-cu illəri əhatə edən genişmiqyaslı tədbirlər isə həm əhalinin həyat şəraitinin yaxşılaşdırılması, həm də kənd təsərrüfatının inkişafı baxımından yeni imkanlar yaradacaq. Bu baxımdan Naxçıvanda həyata keçirilən tədbirləri ayrı-ayrı sahələr üzrə icra olunan layihələr kimi qiymətləndirmək düzgün olmazdı. Burada iqtisadiyyat, enerji, su təsərrüfatı, nəqliyyat və sosial infrastruktur bir-birini tamamlayan vahid inkişaf modelinin tərkib hissələridir. Bu yanaşma Naxçıvanın uzunmüddətli və dayanıqlı inkişafı üçün mühüm zəmin yaradır", - deyə siyasi şərhçi bildirib.
Ülviyyə Zülfiqar qeyd edib ki, bütün bunlarla yanaşı, yeni nəqliyyat imkanlarının yaranması Naxçıvanın gələcək inkişaf perspektivlərinə əlavə strateji məzmun verir. Azərbaycanın əsas hissəsi ilə Naxçıvan arasında birbaşa bağlantının yaradılması, dəmir yolu əlaqəsinin bərpası və Qars–İğdır–Naxçıvan dəmir yolu layihəsinin həyata keçirilməsi muxtar respublikanın tranzit və logistika imkanlarını əhəmiyyətli dərəcədə genişləndirəcək. “Prezident İlham Əliyevin müsahibəsində bu məsələlərə xüsusi yer ayırması Naxçıvanın gələcəyinin daha geniş regional nəqliyyat və iqtisadi əməkdaşlıq xətti çərçivəsində nəzərdən keçirildiyini göstərir. Nəqliyyat bağlantılarının genişlənməsi Naxçıvanın coğrafi mövqeyinin iqtisadi üstünlüyə çevrilməsi, yeni ticarət əlaqələrinin formalaşması və muxtar respublikanın regional logistika sistemində rolunun artması üçün mühüm imkanlar yaradır. Prezident İlham Əliyevin Naxçıvana növbəti səfəri görülmüş işlərin qiymətləndirilməsi ilə yanaşı, qarşıdakı mərhələnin prioritetlərinin müəyyənləşdirilməsi baxımından da əhəmiyyətlidir. Naxçıvanda iqtisadiyyat, enerji, su təsərrüfatı, nəqliyyat, sosial infrastruktur və idarəetməni əhatə edən genişmiqyaslı yenilənmə prosesi gedir. Bu prosesin ardıcıllığı Naxçıvanın ölkənin ümumi inkişaf tempinə daha sıx inteqrasiyasına, mövcud potensialının daha dolğun reallaşdırılmasına və regional iqtisadi əlaqələrdə rolunun artmasına imkan yaradır. Dövlətimizin başçısının səfər zamanı verdiyi mesajlar da göstərir ki, qarşıdakı dövrdə əsas məqsəd əldə edilmiş nəticələri möhkəmləndirmək və Naxçıvanın yeni inkişaf imkanlarını real iqtisadi üstünlüklərə çevirməkdir", – deyə Ü.Zülfiqar fikirlərini yekunlaşdırıb.
jpeg_1789900109.jpeg)
