"Məhkəmə idarəçiliyi sahəsində qlobal çağırışlar" mövzusunda beynəlxalq konfrans panel sessiyalarla davam edir  

Bakıda keçirilən Azərbaycan Respublikası Məhkəmə-Hüquq Şurasının 20 illiyinə həsr olunmuş "Məhkəmə idarəçiliyi sahəsində qlobal çağırışlar" mövzusunda beynəlxalq konfrans öz işini panel sessiyalarla davam etdirir.

AZƏRTAC xəbər verir ki, birinci sessiyada təşkil olunan "Məhkəmə idarəçiliyi sahəsində qlobal çağırışlar və həlli yolları” adlı panel müzakirə Məhkəmə-Hüquq Şurasının üzvü, Ali Məhkəmənin Mülki kollegiyasının sədri Sənan Hacıyevin moderatorluğu ilə keçirilib.

Panel sessiyada "Hakim korpusunun komplektləşdirilməsi" mövzusunda çıxış edən Məhkəmə-Hüquq Şurasının üzvü, Ali Məhkəmənin sədrinin müavini Çingiz Əsgərov qeyd edib ki, Avropa Şurasının Ədalət Mühakiməsinin Səmərəliliyi üzrə Avropa Komissiyasının hesabatına əsasən, hər 100 min əhaliyə düşən hakim sayı Azərbaycanda orta Avropa göstəricisindən 3 dəfə aşağıdır. Belə ki, ölkəmizdə bu rəqəm hazırda təxminən 6,3-dür, Avropada isə 17,6-dır.

Çingiz Əsgərovun sözlərinə görə, son 3 ildə 1600-dən çox hakimliyə namizəd seçim prosesində iştirak edib, onlardan 210-u seçilərək yüksək hakim vəzifəsinə təyin olunub: "Yeni təyin edilmiş hakimlərin əksəriyyəti 35 yaşa qədər olan şəxslərdir. Onların təxminən 50 faizini qadınlar təşkil edir. İntensiv seçim nəticəsində cari ilin sonunda hakimlərimizin sayının 700-ə, növbəti mərhələdə isə 800-ə çatdırılması nəzərdə tutulur".

Türkiyənin Hakimlər və Prokurorlar Şurasının sədri vəzifəsini icra edən Fuzuli Aydoğdu panel sessiyada "Məhkəmə idarəetməsində qlobal çağırışlar və müasir beynəlxalq həllər" mövzusunda çıxış edib. O bildirib ki, milli qanunvericilik sistemləri qapalı sistem olmaqdan çıxıb: "Qlobal normalar və beynəlxalq qərarlar daxili hüquqda president kimi nəzərə alına bilər, biz bunlara uyğunlaşmalıyıq. Artıq məhkəmə sistemində beynəlxalq qərarlara referans edilir. Eyni zamanda, insan haqları müqavilələrinə, rəqəmsal və transmilli texnologiyalara, beynəlxalq miqrasiya hərəkəti proseslərinə, fərqli dil, mədəniyyət və məhkəmə sistemlərinə tərəfdaş olmalıyıq".

Sloveniya Respublikasının Məhkəmə-Hüquq Şurasının sədri Urska Kezmah "Sloveniyada məhkəmə idarəetməsində rəqəmsallaşma problemləri" mövzusunda çıxış edib. O bildirib ki, məhkəmə-hüquq sistemində rəqəmsallaşma prosesi daha da sürətləndirilməlidir: "Sloveniya rəqəmsallaşma sahəsində fəallıq nümayiş etdirib. Ölkədə rəqəmsallaşma baxımından son onilliklər ərzində vacib olan qanunvericilik bazası, elektron baza hazırlanıb. Eyni zamanda, kriminal prosedurların tətbiq olunması, həmçinin məhkəmə qərarının icrası baxımından kifayət qədər müvafiq texnologiyalar yaradılıb".

Qırğız Respublikasının Hakimlər Şurasının sədri Aida Seidaakmatova "Məhkəmə inzibatçılığının gücləndirilməsində Məhkəmə-Hüquq Şurasının rolu" mövzusunda çıxış edib. O bildirib ki, Qırğız Respublikasında Hakimlər Şurası tərəfindən hakimlərin seçimi təşkil olunur: "Bizim ölkədə gələcəkdə Hakimlər Şurasının təşkil edilməsi hakimlərin qurultayı vasitəsilə həyata keçiriləcək. Konstitusiyaya əsasən, hakimlərin qurultayı təşkil olunur. Bundan başqa, respublikmızda hakimlərin sayının artırılması ilə əlaqədar qanun qəbul edilib".

Şimali Kipr Türk Cümhuriyyətinin Ali Məhkəmə Şurasının və Ali Məhkəməsinin sədri Bertan Özərdağ "Qlobal təkmilləşdirmələr çərçivəsində Şimali Kipr Türk Cümhuriyyətinin yurisdiksiyasına dair ümumi yanaşma" mözvusunda çıxış edərək bildirib ki, bu cür konfranslarda iştirak ölkələr arasında əməkdaşlığı gücləndirir. "Ölkələrimiz bir-birlərinin hüquq sistemi haqqında məlumat əldə edir və təcrübələri paylaşır. Bu gün bir çox ölkənin məhkəmə-hüquq sistemi ilə bağlı məlumatlar əldə edirik. Biz də öz ölkəmiz haqqında müəyyən məlumatları təqdim edəcəyik. Bu bizim əməkdaşlığımız üçün əhəmiyyətli olacaq. Şimali Kipr hüququn aliliyinə əsaslanan demokratik hökumətlər bölgüsünə aiddir. Məhkəmə hakimiyyəti tərəfsiz və şəffafdır. Şimali Kiprin əsas məhkəmə sistemləri məhkəmələr və ali ədliyyə qurumlarıdır. Bunların səlahiyyətləri qanunvericilik və konstitusiya ilə müəyyən edilir. Ali ədliyyə qurumu 8 məhkəmə hakimi, prezidentin və məclisin təyin etdiyi üzvlər, Baş Prokurorluq və Vəkillər Kollegiyasınım seçmiş olduğu üzvlər daxil olmaqla, 12 nəfərdən ibarətdir", - deyə o vurğulayıb.