Müraciətlərin artması bu cür mərkəzlərin coğrafiyasının genişləndirilməsini şərtləndirir

Mühəndislərin bir sözü var: "İşləyirsə, əl dəymə". Amma biznesdə bu qayda işləmir. Çünki yaxşı işləyən daha yaxşı işləyə bilər. Bu prinsip sahibkarlara çox tanışdır, onlar rəqabətə adətən bundan istifadə edərək girirlər. Rəqabət isə sahibkarlara malik olduqları ilə kifayətlənməyə imkan vermir.

İş adamları deyirlər ki, biznes çayın axarına qarşı üzmək kimidir. Üzmürsənsə, çay səni götürüb aparacaq. Deməli, çayın axarına qarşı üzmək biznesi inkişaf etdirmək, rəqabətə tab gətirmək deməkdir. Və bu mühitdə formalaşan biznes güclənir, inkişaf edir. 

İdmançılar yarışda medal uğrunda, biznesdə isə sahibkarlar mənfəət üçün mübarizə aparırlar. Mənfəət biznesin inkişafı üçün ən vacib şərtdir. Mənfəətin hesabına əməkhaqları verilir, vergilər və sosial ödənişlər köçürülür, yeni avadanlıqlar alınır, ən son texnologiyalar tətbiq edilir, istehsal genişləndirilir və s. Həm də bu səbəbdən  Azərbaycanda sahibkarlığın inkişafı üçün biznes və investisiya mühiti davamlı olaraq yaxşılaşdırılır, qanunvericilik bazası təkmilləşdirilir. Məhz bunlardan istifadə edib "axara qarşı üzməyi" bacaranlar bu gün iqtisadiyyatın davamlı və tarazlı yüksəlişinin  təmin edilməsində, regionların sosial-iqtisadi inkişafında böyük rol oynayırlar. 

Dünyanın hər yerində iqtisadi inkişafın lokomotivi kiçik və orta sahibkarlıq qəbul edilir. Kiçik və orta sahibkarlar iqtisadi fəallığın və məşğulluğun təminatında, ən əsası orta təbəqənin formalaşmasında həlledici söz sahibi hesab olunurlar. O üzdən kiçik və orta sahibkarlığın inkişafı ilə bağlı Azərbaycanın da siyasəti sahibkarlığa dövlət himayəsinin sistemli şəkildə həyata keçirilməsinin və onlara dövlət dəstəyi tədbirlərinin səmərəsinin yüksəldilməsinin təmin edilməsinə yönəlmiş özəl sektora  dövlət maliyyə köməyi mexanizmi yaradılmışdır. Bu sırada Kiçik və Orta Biznesin İnkişafı Agentliyi (KOBİA) sahibkarlar və biznesə yeni başlayanlar üçün dövlət və biznes xidmətlərinin mərkəzləşdirilmiş qaydada təqdim edildiyi vahid məkandır. Həmin məkana KOBİA strukturunda fəaliyyət göstərən kiçik və orta biznes evləri (KOB evləri) də demək olar. Biznesə göstərilən dövlət xidmətlərinin yaxşılaşdırılmasına, bu xidmətlərə asan və rahat çıxışın təmin olunmasına, dövlət-sahibkar münasibətlərinin daha çevik və şəffaf mexanizmlərlə həyata keçirilməsinə xidmət edən KOB evlərinin fəaliyyəti artıq bir neçə ildir ki, iş adamlarına xidmət sahəsində əhəmiyyətli dönüş yaradıb. 

Hazırda Yevlax, Xaçmaz və Bakıda  olmaqla 3 KOB evi fəaliyyət göstərir.  İlk KOB evi 2020-ci ilin fevral ayından Xaçmaz şəhərində, ikincisi isə 2021-ci ilin aprelindən Yevlax şəhərində sahibkarların istifadəsindədir. Sayca 3-cü olan Bakı KOB evi isə 2023-cü ilin yanvarında Prezident İlham Əliyevin iştirakı ilə açılıb. Qeyd edək ki, aparılan islahatların əsas istiqamətlərindən biri vətəndaşlara göstərilən dövlət xidmətlərinin daha keyfiyyətli həyata keçirilməsi, onların daha əlçatan olması, habelə bu sahədə şəffaflığın və operativliyin təmin edilməsidir. KOB evlərinin yaradılması da məhz bu məqsədi daşıyır. İş adamları biznes fəaliyyəti üçün zəruri olan sahibkarlıq fəaliyyətinin qeydiyyatı, lisenziya, icazə və digər lazımi sənədlər, biznes-planın hazırlanması, güzəştli maliyyə vəsaitlərinə çıxış, vergi, gömrük, kommunal, bank, sığorta, notarius və digər xidmətlər üçün KOB evlərinə müraciət edirlər. Bütün bunlar isə rahatlıqdan savayı, vaxta və xərclərə qənaət deməkdir. 

KOBİA-nın məlumatına görə, bu il martın 3-dən etibarən Bakı KOB evində daha bir xidmət fəaliyyətə başlayıb. Rəqəmsal İnkişaf və Nəqliyyat Nazirliyinin tabeliyində Dövlət Dəniz və Liman Agentliyi (DDLA) tərəfindən təqdim edilən xüsusi hazırlıq şəhadətnamələrinin kurslarda iştirak etmədən yenilənməsi ilə bağlı müraciətlərin qəbulu artıq Bakı KOB evində həyata keçiriləcək. Qeyd edək ki, KOB evlərində 50-yə yaxın dövlət və özəl qurum tərəfindən sahibkarlıq fəaliyyəti üçün zəruri olan 400-dən çox dövlət-biznes ("G2B") və zəruri biznes ("B2B") xidmətləri göstərilir. Üstəlik, KOB evlərində sahibkarlara göstərilən xidmətlərin əhatə dairəsi getdikcə genişlənir. Məhz bu səbəbdən KOB evlərinə sahibkarlar tərəfindən edilən müraciətlərin sayında davamlı artım müşahidə olunur. Təkcə 2024-cü ildə KOB evlərində sahibkarlara 371 mindən çox xidmət göstərilib. Göstərilmiş xidmətlərin 288 min 255-i Bakı, 61 min 326-sı Yevlax, 21 min 723-ü Xaçmaz KOB evlərinin payına düşüb. Xidmətlərin 350 minə yaxını dövlət, 21 mindən çoxu isə biznes qurumları tərəfindən olub.

KOB evlərinə olan maraq onun sayının artırılmasını tələb edir. Bu səbəbdən hazırda Gəncədə KOB evinin yaradılması istiqamətində zəruri işlər görülür. Ölkənin digər şəhər və rayonlarında, o cümlədən Qarabağ və Şərqi Zəngəzurda da KOB evlərinin yaradılması nəzərdə tutulur. 

Züleyxa ƏLİYEVA,

"Azərbaycan"