Yay ilin ən sevilən və səbirsizliklə gözlənilən fəslidir. Bu fəsil insanlara yalnız isti hava deyil, həm də istirahət etmək, gündəlik həyatın yorğunluğundan uzaqlaşmaq və təbiətlə daha çox ünsiyyətdə olmaq imkanı yaradır. Günəşli günlər, uzun axşamlar və təmiz hava insanın həm fiziki, həm də mənəvi cəhətdən özünü daha yaxşı hiss etməsinə kömək edir.
Yayın ən gözəl tərəflərindən biri isə çimərliklərdə keçirilən vaxtdır. Çimərliklər yay mövsümünün ayrılmaz hissəsidir. İnsanlar ailələri, dostları və yaxınları ilə birlikdə dəniz sahilinə gedərək həm istirahət edir, həm də yaddaqalan xatirələr toplayırlar. Dənizin sərin suyu yayın istisindən qorunmağın ən xoş yollarından biridir. Qumda oynayan uşaqlar, günəş vannası qəbul edərək dəniz suyunda sərinlənən böyüklər yayın yaratdığı fürsətdən zövq alırlar. Belə anlar insanın əhvalını yüksəldir, stresini azaldır və onu gündəlik qayğılardan bir müddət uzaqlaşdırır.
Çimərliklər istirahət məkanı olmaqla yanaşı, həm də sağlam həyat tərzini təşviq edən mühitdir. Dəniz havası və günəş şüaları düzgün vaxt və ölçüdə qəbul edildikdə sağlamlıqdır. Təbii ki, günün ən isti saatlarında birbaşa günəş altında qalmamaq və günəşdən qoruyucu vasitələrdən istifadə etmək şərti ilə. Üstəlik, çimərliklərdən istifadə edərkən məsuliyyətli davranmaq lazımdır.
Eyni zamanda ətraf mühiti çirkləndirməmək, tullantıları xüsusi qutulara atmaq, dənizi və sahili təmiz saxlamaq da unudulmamalıdır. Təbiəti qorumaq gələcək nəsillərin də bu gözəlliklərdən istifadə edə bilməsi üçün vacib şərtdir.
Yay mövsümü insanlara yeni enerji, xoş emosiyalar və unudulmaz xatirələr bəxş edir. Çimərliklər isə bu mövsümün ən çox üz tutulan ünvanlarından biri kimi insanların bir araya gəlməsinə, istirahət etməsinə və yayın ləzzətindən dadmağa imkan yaradır. Dəniz ləpələrinin səsi, qumun istiliyi və günəşin parlaq şüası yayın özünəməxsus gözəlliyini tamamlayır. Məhz buna görə də yay fəsli insanlara həmişə sevinc, rahatlıq və xoş anlar bəxş edir.
Nərminə ƏSGƏROVA,
İlham BABAYEV (foto),
"Azərbaycan"
677jpg_1790033437.jpg)
