Son klinik sınaq nəticələrinə görə, ev şəraitində beyin stimulyasiyası ağır və orta dərəcəli depressiyanın effektiv və təhlükəsiz şəkildə yüngülləşdirilməsinə kömək edə bilər.
AZƏRTAC xəbər verir ki, tədqiqatın nəticələri qeyri-invaziv beyin stimulyasiyası ilə müalicə olunan xəstələrdə depressiyanın remissiyası və müalicəyə cavab reaksiyasının üç dəfə daha yüksək olduğunu göstərir.
Texasdakı Mak Qovern Tibb Məktəbinin psixiatriya kafedrasının müdiri Ceyr Soares bu innovativ üsulun yaxın gələcəkdə depressiya kimi əhval pozğunluqlarından əziyyət çəkən xəstələr üçün ümidverici ola biləcəyini bildirib.
Tədqiqatda depressiya diaqnozu qoyulmuş 174 nəfər iştirak edib. İştirakçılar təsadüfi olaraq iki qrupa bölünüb və 10 həftə ərzində müalicə kursu alıblar. Bir qrup transkranial birbaşa cərəyan stimullaşdırması (tDCS) ilə müalicə olunub, digəri isə bu müalicəni qəbul etməyib. Stimulyasiya alan xəstələr il üç həftədə beş dəfə 30 dəqiqəlik seans, sonrakı 7 həftə ərzində isə həftədə üç dəfə eyni müddətdə seans keçiriblər. Transkranial birbaşa cərəyan stimullaşdırılması baş dərisinə iki elektrod vasitəsilə 0,5-2 milliamper arasında cərəyanın tətbiqi yolu ilə həyata keçirilir. Bu zaman xəstələr yalnız baş dərisində yüngül qıcıqlanma hiss edirlər.
Maraqlıdır ki, bu terapiya ev şəraitində öz-özünə tətbiq edilib. Tədqiqat nəticələrinə əsasən, stimullaşdırma ilə müalicə alanların 45 faizi tamamilə sağalır, bu isə nəzarət qrupundakı şəxslərin yalnız 22 faizində müşahidə olunub.
London Kral Kollecinin professoru və baş tədqiqatçı Sintia Fu, bu üsulun antidepresantlar və terapiya ilə yanaşı, effektiv alternativ ola biləcəyini vurğulayıb.
Tədqiqatın nəticələri “Nature Medicine” jurnalında dərc olunub.
 (1)jpg_1732227508.jpg)
