Aylar da insanlar kimidir. Öz ömürləri, taleləri olur. Ramazan ayı bəxti mübarək yazılan, xoşbəxt aydır. İnsanların ruhuna, qəlbinə işıq saçan, mənəvi dünyamızı təmizləyən, ruhumuzu paklaşdıran aydır. Ramazan Allahın qüdrətindən pay verib, insanların yoluna nur çilədiyi, Tanrının dörd müqəddəs səmavi kitabını, "Zəbur"u, "İncil"i, "Tövrat"ı və "Quran"ı göndərdiyi aydır. Ramazan xoş niyyət, xoş arzu, xoş dilək ayıdır. Xeyrin şərlə, nəfsin imanla mübarizə aparıb paklaşdığı, imanla iradənin vəhdəti, saflığın kamilliyə, insan ruhunun Tanrıya tapındığı aydır. Ramazan imanın sınağa çəkildiyi, duaların qəbul olunduğu aydır.
İllər idi ki, dilimizdən Qarabağ nidası əskik olmurdu. Dualarımız Qarabağla başlayıb, Qarabağla bitirdi. Möminlərimiz, inanclı insanlarımız haqq işi uğrunda mübarizədə Alladan imdad dilər, illərin Qarabağ həsrətinə son qoyulması üçün Tanrıya dualar edilərdi. Həm də bu duaları təkcə azərbaycanlılar etməzdi. Azərbaycanda yaşayan bütün xalqların nümayəndələri - yəhudilər, ruslar, udilər, bir sözlə, canını vətənimiz Azərbaycan üçün fəda etməyə hazır olan, dinindən, dilindən asılı olmayaraq hər bir namuslu Azərbaycan vətəndaşı öz etiqadı ilə Tanrıya tapınardı.
İşimiz haqq, niyyətimiz hasil olduğu üçün Allah dualarımızı qəbul etdi. Artıq iki ildir ki, niyyətimizdə nisgil, ürəyimizdə həsrət yoxdur. Artıq fərəhlə deyə bilirik ki, bir zamanlar erməni vandallarının dağıdıb viran qoyduqları, xarabazarlığa çevirdikləri yurd yerlərimizdə həyat bərpa olunur. İllərdir insanlığın, təmiz ruhun, müqəddəs niyyətlərin aclığını çəkən ibadətgahlarımıza, müqəddəs məkanlarımıza, tarixi abidələrimizə can verilib, yenidən həyata qaytarılır.
Xilaskar Prezident, Müzəffər Ali Baş Komandan İlham Əliyevin Ramazan bayramı münasibətilə xalqa ünvanladığı təbrikdə bir məqam xüsusi olaraq qeyd edilir: "Məmnunluq hissi ilə qeyd etmək istəyirəm ki, haqq işi uğrunda mübarizədə qazandığımız şanlı zəfərlə azad edilmiş dədə-baba yurdlarımızda həyat yenidən dirçəlir, tarixi-mədəni irsimiz, ibadət yerlərimiz bərpa olunur, məscidlərimizdən azan sədaları yüksəlir".
Ədalət naminə qeyd edək ki, bütün bunlar təkcə möminlərimizin etdikləri duaların hesabına deyil. Eyni zamanda polad iradənin, qətiyyətin, illərdir aparılan düzgün ardıcıl siyasətin, vaxtında qəbul edilmiş qətiyyətli və dürüst qərarların, xalqımızın hakimiyyətlə sarsılmaz birliyinin, Azərbaycan Ordusunun qüdrətinin, dəmir intizamın və bütün bunların sayəsində 44 günlük Zəfər müharibəsində düşmən üzərində çalınan qələbənin məntiqi nəticəsidir.
Hər zaman xalqımızı qələbəyə aparan, bizlərə əsl bayram sevincini yaşadıb Tanrı dərgahına üz tutan Vətən oğullarının unudulmaz xatirəsini əziz tutan Azərbaycan Prezidenti, Müzəffər Ali Baş Komandan İlham Əliyev "Azərbaycanın müstəqilliyi və ərazi bütövlüyü uğrunda həyatını qurban vermiş qəhrəman şəhidlərimizin ölməz xatirələrini bu mübarək bayram günlərində bir daha ehtiramla yad edir, onlara Allahdan rəhmət, ailələrinə səbir, qazilərimizə cansağlığı diləyirəm" deməklə ovqatlarına bayram ovqatı qatdı.
İnsan gördüyü işlər, xeyirxah əməlləri, xoş niyyəti ilə insan olur. İnsan qazandığını bölməyi bacaranda, başqalarının qəlbini sevindirəndə, yalnız torpaq üstə deyil, qəlblərdə saraylar ucaldanda, özündən imkansızların ürəyində yurd salanda insan olur. Ramazan bölüşməyi bacaran, varından keçib kasıbı, kimsəsizi, imkansızı sevindirə bilən bayram olur. Oruc təkcə mədənin aclığı deyil. Nəfsinə, gözünə-könlünə toxluq verməyi bacaran saf niyyətli insanların bayramıdır. Bu bayramın əsas məntiqi nəticəsi aclığı həyatında yaşayıb, ac qalmağın nə olduğunu öz həyatında hiss edib, yoxsula əl tutmaqla, malından fitrə və zəkat verməklə yekunlaşır. Bəzən insanlarımız sədəqəni mal-mülkün varlığı ilə ölçür. Hesab edirlər ki, sədəqə yalnız maddi nemətlərdən verilə bilər. Müqəddəs kitabımız "Qurani-Kərim"də qeyd edilir ki, "Xoş o adamın halına ki, elmi olub, elmindən sədəqə verə". İnsanların kamilləşməsi üçün deyilən hər söz, edilən hər xoş niyyət özü ən qiymətli sədəqədir.
Ramazan birlik, bərabərlik, xoş niyyət, barış bayramıdır. Ramazan sevgi bayramıdır. Hamımız bu vətənin övladları olduğumuz üçün ilk dualarımız bu vətənə, onun yolunda canlarını fəda edənlərə olmalıdır. Onda nemətimiz bərəkətli, süfrəmiz bol, dualarımız qəbul olar. Bu müqəddəs Ramazan günlərində Tanrı niyyətlərimizi xoş, əməllərimizi saf, orucumuzu qəbul etsin...
Elşən QƏNİYEV,
"Azərbaycan"
jpg_1766048684.jpg)
