“Güclü cəmiyyətin zərif simaları” layihəsi çərçivəsində
növbəti görüş Şamaxı rayonunda keçirilib.
Tədbirdə çıxış edən Milli Məclisin deputatı
Könül Nurullayeva qadınların ictimai həyatda rolu, dövlətimizin qadın siyasəti,
ailə institutunun möhkəmləndirilməsi və gənc nəslin milli-mənəvi dəyərlər
ruhunda tərbiyəsi mövzularında fikirlərini bölüşüb. Bildirib ki, qadın
hüquqlarının müdafiəsi, onlar üçün yaradılan bütün imkanların daha da genişləndirilməsi
Prezident İlham Əliyevin dövlət siyasətində müəyyən etdiyi prioritet istiqamətlərdəndir.
“Azərbaycan ailəsində qadının yeri və rolu xüsusi əhəmiyyət daşıyır” deyən
deputat qeyd edib ki, ölkəmizdə gender siyasətinin gücləndirilməsi, qadınların
cəmiyyətdə rolunun artırılması məqsədilə ardıcıl tədbirlər həyata keçirilir:
“Azərbaycan qadını mühüm dövlət qurumlarında, parlament və bələdiyyələrdə
uğurla təmsil olunur, ictimai-siyasi, sosial-iqtisadi, elmi-mədəni proseslərdə
fəal iştirak edir, ölkə idmanının inkişafına böyük töhfələr verir.”
Könül
Nurullayeva öz həyat və fəaliyyət təcrübəsindən də bəhs edərək, motivasiya verən
məqamları da paylaşıb.
Layihənin rəhbəri, “Gələcəyə Körpü” Gənclər
İctimai Birliyinin sədri Nigar Ələsgərova çıxış edərək layihənin məqsədi barədə
danışıb. Bildirilib ki, əsas məqsəd cəmiyyətin inkişafında qadınların rolunu
artırmaq, onların uğur hekayələrini geniş ictimaiyyətə çatdırmaq və cəmiyyətdə
qadın həmrəyliyini gücləndirməkdir.
Tədbirdə Şamaxı rayonundan olan fəal qadınlar,
ictimaiyyət nümayəndələri və gənclər iştirak ediblər. Görüş zamanı iştirakçılar
arasında fikir mübadiləsi aparılıb, qadınların ictimai və sosial həyatda daha fəal
iştirakının təşviq olunması istiqamətində təkliflər dinlənilib.
“Azərbaycan”
