Bəzi insanlar var ki, onların ömrü, sadəcə, yaşanmış illərin cəmi deyil, qazanılan hörmətin tarixidir. Zəhməti ilə ucalan, biliyi ilə seçilən, insanlığı ilə sevilən ziyalı Təbrik Müzəffər oğlu Quliyev də məhz belə ömür sahiblərindəndir.
1946-cı ildə Ordubadda dünyaya göz açmış Təbrik müəllimin taleyinə elm, zəhmət və məsuliyyət yazılmışdı. Aldığı ailə tərbiyəsi, ziyalı mühiti onun gələcək həyat yolunun təməlini möhkəm etdi. Elmə olan marağı onu 1970-ci ildə Azərbaycan Neft-Kimya İnstitutunun (indiki ADNSU) Kimya fakültəsinə gətirdi. Bu, sadəcə, peşə seçimi deyil, gələcək böyük elmi fəaliyyət yolunun başlanğıcı idi.
Ali təhsilini başa vurduqdan sonra təyinatla Sumqayıtda yerləşən Kimya zavodunda əmək fəaliyyətinə laborant kimi başlayan gənc mütəxəssis qısa zamanda öz zəhməti, dəqiqliyi və peşəkarlığı ilə seçildi. 1972-1973-cü illərdə Dünya Gənclər Festivalının istehsalat göstəriciləri üzrə laureatı adını qazanması Təbrikin ilk böyük uğurlarından idi. Ardınca 1983-cü ildə Ümumittifaq Xalq Təsərrüfatı Sərgisinin bürünc medalı, 1984-cü ildə Azərbaycan SSR Dövlət Mükafatı, 1985-ci ildə "İttifaq ixtiraçısı" fəxri adı gəldi. Bu mükafatlar illərin zəhmətinə verilən dəyərin, peşəkarlığın qiyməti idi.
Təbrik müəllimin fəaliyyəti yalnız istehsalatla məhdudlaşmadı. O həm də elmi araşdırmalarla məşğul olaraq 2000-ci ildə kimya elmləri üzrə doktorluq işini uğurla başa çatdırdı. Elm və istehsalatı birləşdirə bilmək hər kəsə nəsib olmur. O isə bu iki sahəni bir-birini tamamlayan qüvvəyə çevirməyi bacardı.
Onun əməyi dövlət tərəfindən də yüksək qiymətləndirilib. 2009-cu ildə "Əməkdar mühəndis" fəxri adına layiq görülüb, 2013-cü ildə SOCAR-ın fəxri fərmanı ilə təltif olunub, 2016-cı ildə isə "Tərəqqi" medalı ilə mükafatlandırılıb. 2019-cu ildə Sumqayıt şəhərinin 70 illik yubileyi ərəfəsində Azərbaycan Prezidentinin fərdi təqaüdünə layiq görülməsi onun şəhərin sənaye və ictimai həyatındakı xidmətlərinə verilən ali qiymətdir.
2011-ci ildən etibarən təqaüdə çıxsa da, o, şəhərin ictimai işlərindən kənarda qalmır. 2022-ci ildə Sumqayıt şəhər Ağsaqqallar Şurasının sədri seçilməsi bir daha göstərdi ki, onun sözü, mövqeyi və təcrübəsi bu gün də dəyərlidir. Ağsaqqallıq, sadəcə, yaş göstəricisi deyil, müdriklik, ədalət və nüfuz deməkdir. Təbrik müəllim bu adı da ləyaqətlə daşıyır.
İ.MƏMMƏDOVA,
Sumqayıt şəhər sakini
jpg_1775472819.jpg)
