Martın 6-dan bəri qeydiyyatına start verilən VI “Yüksəliş” müsabiqəsinə qoşulan iştirakçıların sayı artıq 10 mini ötüb.
Bu barədə AZƏRTAC-a müsabiqənin işçi qrupundan məlumat verilib. Bildirilib ki, ötən 5 mövsüm üzrə müsabiqəyə ümumilikdə 69 min 963 nəfər müraciət edib, onlardan 39 min 536 nəfərin şəxsi kabineti yaradılıb. Namizədlərdən 1254 nəfər yarımfinal mərhələsinə, 488 nəfər final mərhələsinə yüksəlib, 116 nəfər isə qalib adını qazanıb.
Qeydiyyatdan keçənlərin 30.45 faizini qadınlar, 69.55 faizini isə kişilər təşkil edir. Qaliblərin isə 55.63 faizi dövlət sektorunu, 34.51 faizi özəl sektoru, 6.34 faizi beynəlxalq qurumları, 3.52 faizi isə qeyri-hökumət təşkilatlarını təmsil edir.
VI “Yüksəliş” müsabiqəsinə qoşulan iştirakçıların 7 mindən çoxu kişi, 2 mindən çoxu isə qadındır. Eyni zamanda, əvvəlki mövsümlərdə iştirak etmiş şəxslərin sayı 5 mindən çox, yeni iştirakçıların sayı isə 4 mindən çoxdur. “Yüksəliş” müsabiqəsi çərçivəsində yalnız nəzəri biliklər deyil, eyni zamanda, analitik düşüncə, qərarvermə, məsuliyyət götürmə, komanda idarəetməsi və liderlik bacarıqları da qiymətləndirilir. Müsabiqə qalibləri Mentorluq Proqramı, fərdi inkişaf planları və real layihələrdə iştirak imkanları əldə edərək peşəkar inkişaflarını davam etdirirlər. Qaliblərdən 80 nəfərdən çoxu Azərbaycan Nəqliyyat və Kommunikasiya Holdinqi (AZCON), SOCAR, “PAŞA Holding”, Azərbaycan Respublikasının Mərkəzi Bankı, Azərbaycan Respublikasının Dövlət Neft Fondu (SOFAZ), “AzerGold” QSC, bp və “Kapital Bank” ASC kimi ölkənin qabaqcıl dövlət və özəl qurumlarında müxtəlif təyinatlar alaraq məsul vəzifələrdə fəaliyyət göstərirlər.
Qeyd edək ki, VI “Yüksəliş” müsabiqəsi üzrə qeydiyyat aprelin 16-dək davam edəcək. Qeydiyyat “Yüksəliş” müsabiqəsinin rəsmi internet səhifəsi olan yukselish.az vasitəsilə həyata keçirilir. Müsabiqədə iştirak etmək üçün namizədlər Azərbaycan Respublikasının vətəndaşı olmalı, qeydiyyatın son gününə qədər 21-51 yaş aralığında olmalı, ali təhsilə və minimum 2 illik idarəetmə təcrübəsinə malik olmalıdırlar.
Xatırladaq ki, “Yüksəliş” müsabiqəsi Azərbaycan Respublikasının Prezidenti İlham Əliyevin 2019-cu il 26 iyul tarixli Sərəncamına əsasən, intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub. Altıncı “Yüksəliş” müsabiqəsinin keçirilməsi ilə bağlı Prezident İlham Əliyev tərəfindən 2025-ci il dekabrın 10-da müvafiq Sərəncam imzalanıb.
jpeg_1774955357.jpeg)
jpg_1774953671.jpg)
