2028-ci ildə MDB-yə sədrliyinin təsdiqlənməsi Azərbaycanın liderlik nüfuzundan xəbər verir
Müstəqil Dövlətlər Birliyinin (MDB) 35 illik fəaliyyəti dövründə Azərbaycan hər zaman öz milli maraqlarına, qarşılıqlı hörmətə və faydalı əməkdaşlığa söykənən siyasət yürüdüb. Bu illər ərzində ölkəmiz təşkilat çərçivəsində yalnız iqtisadi və siyasi dialoqa töhfə verməklə kifayətlənməyib, həm də regional təhlükəsizlik və sabitliyin təmin olunmasında fəal mövqe nümayiş etdirib. Həmçinin humanitar, mədəni və idman sahələrində həyata keçirilən genişmiqyaslı layihələr Azərbaycanın MDB məkanında birləşdirici və aparıcı qüvvə kimi nüfuzunu daha da möhkəmləndirib.
Bu ardıcıl və məqsədyönlü siyasətin məntiqi nəticəsi kimi, Türkmənistanın Türkmənbaşı şəhərində keçirilən MDB Dövlət Başçıları Şurasının məhdud tərkibdə iclasında alınan qərar ölkəmiz üçün tarixi əhəmiyyət kəsb edir. Azərbaycanın 2027-ci ildə təşkilata həmsədrliyinin, 2028-ci ildə isə müstəqillik tarixində ilk dəfə MDB-yə sədrlik edəcəyinin təsdiqlənməsi ölkəmizin Birlik məkanında nüfuzunun, yüksək etimadın və regional liderliyinin növbəti parlaq təzahürüdür.
Bu hədəflər Azərbaycanın regional tranzit rolunu daha da möhkəmləndirəcək
Azərbaycanın MDB çərçivəsindəki fəaliyyətinin əsas istiqamətlərindən biri humanitar və mədəni əməkdaşlıqdır. Şərqi Zəngəzurun incisi olan Laçın şəhərinin 2025-ci ildə “MDB-nin mədəniyyət paytaxtı” elan edilməsi mədəni hadisə olmaqla yanaşı, həm də mühüm siyasi əhəmiyyət kəsb edən addım oldu.
MDB Dövlət Başçıları Şurasının məhdud tərkibdə iclasında Prezident İlham Əliyev bu qərarın əhəmiyyətini xüsusi vurğulayaraq bildirib ki, humanitar sahədə əməkdaşlıq əsas istiqamətlərdən biridir. Laçın şəhərinin Birliyin mədəniyyət paytaxtı elan edilməsi qərarını dəstəklədiklərinə görə MDB dövlət başçılarına minnətdarlığını bildirən dövlətimizin başçısı qeyd edib ki, ötən il Laçında keçirilən genişmiqyaslı tədbirlər qonaqlarımıza bu bölgənin zəngin və qədim tarixi ilə daha yaxından tanış olmağa imkan verdi. Onlar Laçının sürətli dirçəlişinin, həmçinin aparılan bərpa işlərinin miqyasının əyani şahidi ola bildilər.
Azərbaycan yalnız siyasi və iqtisadi müstəvidə deyil, idman sahəsində də mühüm platformalara evsahibliyi edir. Gəncə və digər Azərbaycan şəhərlərini əhatə edən III MDB Oyunları təşkilatın tarixində ən genişmiqyaslı tədbirlərdən birinə çevrildi.
Dövlətimizin başçısı idmanın birləşdirici rolunu xarakterizə edərək vurğulayıb ki, III MDB Oyunlarının Azərbaycanda uğurla keçirilməsi bütün Birlik üçün əlamətdar idman hadisəsinə çevrildi: “Yarışların coğrafiyası ölkəmizin yeddi şəhərini əhatə etdi. MDB üzv dövlətlərindən, həmçinin dünyanın digər ölkələrindən minlərlə idmançı və qonaq Azərbaycanda olduqları 11 gün ərzində ölkəmizi və xalqımızı yaxşı tanıdılar. Bu cür genişmiqyaslı təşəbbüslər idmanın hüdudlarından kənara çıxır. Onlar xalqlar arasında möhkəm dostluq körpüsü rolunu oynayır”.
Bu yarışlar Xankəndinin timsalında həm də işğaldan azad edilmiş bölgələrimizdə idman infrastrukturunun inkişafını, eləcə də ölkəmizin qonaqpərvərliyini dünyaya göstərmək üçün unikal imkan yaratdı.
Azərbaycan əlverişli coğrafi mövqeyini müasir infrastrukturla tamamlayaraq Avrasiya məkanının əsas logistik mərkəzlərindən birinə çevrilib. Ölkəmiz MDB üzvü olan dövlətlər, xüsusən Mərkəzi Asiya ölkələri üçün Xəzər dənizi üzərindən Avropaya və əks istiqamətə təhlükəsiz tranzit imkanları təqdim edir.
Prezident İlham Əliyev tranzit həcmlərinin artımını faktlarla diqqətə çatdıraraq bildirib ki, əlverişli coğrafi mövqeyə malik olan ölkəmiz müasir nəqliyyat və logistika infrastrukturunu praktik olaraq sıfırdan qurub: “Azərbaycan regionun əsas nəqliyyat qovşaqlarından biri kimi öz mövqeyini davamlı olaraq möhkəmləndirir, Şimal-Cənub və Şərq-Qərb beynəlxalq dəhlizləri boyunca etibarlı tranziti təmin edir”.
2026-cı ilin birinci yarısında Azərbaycandan keçən tranzit daşımalarının həcmi 10 faiz artaraq təxminən 8 milyon tona çatıb. Ortamüddətli perspektivdə məqsəd Şərq-Qərb marşrutu və Şimal-Cənub marşrutu üzrə Azərbaycandan keçən yükdaşımaları hər bir istiqamətdə 15 milyon tona çatdırmaqdır.
Bu hədəflər Azərbaycanın regional tranzit rolunu daha da möhkəmləndirəcək, ölkə iqtisadiyyatına əlavə gəlirlər gətirəcək və birlik ölkələri arasında iqtisadi inteqrasiyanı dərinləşdirəcək.
Çoxvektorlu xarici siyasətin təzahürü
Prezident İlham Əliyev Azərbaycanın 2027-ci ildə MDB-yə həmsədrlik etmək qərarını dəstəklədiklərinə görə həmkarlarına minnətdarlığını bildirib: “Ölkəmiz bunu yüksək etimadın əlaməti kimi qiymətləndirir və ortaq məqsədlərin həyata keçirilməsində fəal iştirak etməyə hazır olduğunu nümayiş etdirir. Azərbaycan, həmçinin 2028-ci ildə MDB-yə sədrliyi öz üzərinə götürməyə və həmin ilin payızında MDB Dövlət Başçıları Şurasının iclasına ev sahibliyi etməyə hazırdır”.
MDB çərçivəsində 2027-ci ildə sədrlik Özbəkistana keçəcək. Bu dövrdə Türkmənistan, Özbəkistan və Azərbaycan qurumun troyka mexanizmini formalaşdıracaqlar. Əlamətdar haldır ki, Azərbaycan müstəqillik tarixində ilk dəfə MDB-yə sədrlik funksiyasını öz üzərinə götürür. Əvvəlki illərdə Ermənistan-Azərbaycan münaqişəsinin həll olunmaması və işğal faktı ölkəmizin bu missiyanı icra etməsinə mane olurdu. Ərazi bütövlüyünün və suverenliyin tam təmin edilməsindən sonra Azərbaycanın MDB sədri seçilməsi regionda yaranmış yeni geopolitik reallıqların əyani göstəricisidir.
MDB-yə sədrlik Azərbaycanın çoxtərəfli diplomatiyasının yalnız bir halqasıdır. Azərbaycan Mərkəzi Asiya Dövlət Başçılarının Məşvərət Görüşü, Türk Dövlətləri Təşkilatı (TDT), Asiyada Qarşılıqlı Fəaliyyət və Etimad Tədbirləri üzrə Müşavirə (CICA) və MDB çərçivəsində sədrlik funksiyalarını uğurla icra edən aparıcı mərkəzə çevrilir.
Gələn il İslam Əməkdaşlıq Təşkilatına (İƏT) sədrlik Azərbaycana keçəcək və təşkilatın Zirvə görüşü ölkəmizdə təşkil olunacaq. 2028-ci ildə isə Azərbaycan geniş Avropa coğrafiyasını bir araya gətirən Avropa Siyasi Birliyinin Zirvə görüşünə evsahibliyi edəcək.
Bütün bunlar çoxvektorlu xarici siyasətin təntənəsidir. Rəsmi Bakı bir tərəfdən Avropa İttifaqı ilə enerji və nəqliyyat tərəfdaşlığını inkişaf etdirir, digər tərəfdən Qoşulmama Hərəkatı və İslam Əməkdaşlıq Təşkilatında aparıcı rol oynayır, eyni zamanda MDB və TDT çərçivəsində əlaqələrini dərinləşdirir.
Bu nümunələr Azərbaycanın regional və qlobal miqyasda söz sahibi olan, təşəbbüsləri dəstəklənən və etibarlı tərəfdaş kimi qəbul edilən ölkə olduğunu bir daha təsdiqləyir.
Yasəmən MUSAYEVA,
“Azərbaycan”
