Yeni Azərbaycan Partiyası (YAP) Sədrinin müavini – Mərkəzi Aparatın rəhbəri Tahir Budaqovun başçılıq etdiyi, YAP İdarə Heyətinin üzvü, Milli Məclisin deputatı Kamal Cəfərov, partiyanın Mərkəzi Aparatının Beynəlxalq əlaqələr və humanitar məsələlər şöbəsinin müdiri Hülya Məmmədli və İnformasiya texnologiyaları və ictimaiyyətlə əlaqələr şöbəsinin müdiri Nurlan Qələndərovdan ibarət nümayəndə heyəti Kubaya səfər edib.
Partiyadan AZƏRTAC-a bildirilib ki, Kuba Kommunist Partiyasının (KKP) dəvəti əsasında baş tutan səfər çərçivəsində Kuba Kommunist Partiyası Mərkəzi Komitəsinin Birinci katibi, Kuba Prezidenti Miqel Mario Dias-Kanel Bermudes nümayəndə heyətini qəbul edib.
Qəbul zamanı Azərbaycan ilə Kuba arasında münasibətlərin tarixi köklərə əsaslandığı qeyd olunaraq xalqımızın Ümummilli Lideri Heydər Əliyevin və Kubanın Ali Baş Komandanı Fidel Kastronun bu istiqamətdə müstəsna xidmətləri vurğulanıb. Ölkələrarası münasibətlərin dostluq və bərabərhüquqlu tərəfdaşlıq əsasında inkişaf etdiyi, siyasi dialoq fonunda müxtəlif sahələrdə geniş əməkdaşlıq imkanlarının mövcudluğu qeyd edilib. Həm Azərbaycan, həm də Kubanın beynəlxalq sistemdə müstəqil siyasət yürütməsinin əhəmiyyəti vurğulanıb. Qlobal çağırışlar şəraitində iki ölkənin BMT və Qoşulmama Hərəkatı kimi təşkilatlar çərçivəsində səmərəli əməkdaşlığının dövlət maraqlarının qorunmasına xidmət etdiyi bildirilib. BMT-də Kubaya qarşı embarqonun ləğvinə dair qətnamələrin Azərbaycan tərəfindən ardıcıl dəstəkləndiyi, Kubanın da regionda sülh və təhlükəsizlik məsələlərində Azərbaycanın ədalətli mövqeyini paylaşdığı qeyd olunub. Azərbaycan-Kuba münasibətlərində YAP və Kuba Kommunist Partiyasının önəmli rolu qeyd edilərək, qarşılıqlı səfərlərin və təmasların təcrübə mübadiləsi və əməkdaşlığın gücləndirilməsinə xidmət etdiyi vurğulanıb.
Nümayəndə heyətinin Xalq Hakimiyyəti Milli Assambleyasının və Dövlət Şurasının sədri Xuan Esteban Lazo Hernandes ilə də görüşü keçirilib.
Görüşdə Yeni Azərbaycan Partiyasının Sədri, Prezident İlham Əliyev və Prezident Miqel Dias-Kanelin iki ölkə arasındakı münasibətlərə xüsusi önəm verdikləri, siyasi partiyalar və parlamentlərarası əlaqələrin əməkdaşlığın inkişafında vacib rol oynadığı qeyd olunub. Tərəflər milli maraqlar və beynəlxalq hüquq əsasında konstruktiv münasibətlərin tərəfdarı olduqlarını bildiriblər. Yeni geosiyasi şəraitdə ikili standartların təhlükəsizlik üçün risk yaratdığı vurğulanaraq, bu hallara qarşı qətiyyətli mövqenin əhəmiyyəti xüsusi qeyd edilib. Qarşılıqlı maraq doğuran digər məsələlər də müzakirə olunub.
KKP Mərkəzi Komitəsi Katibliyinin üzvü Xose Ramon Monteaqudo Ruiz və Kuba xarici işlər nazirinin birinci müavini Herardo Penyalver Portal ilə görüşlər zamanı isə YAP nümayəndə heyətinin dost ölkəyə səfərinin önəmi vurğulanaraq, qarşılıqlı fikir mübadiləsinin əlaqələrin mövcud vəziyyəti və gələcək imkanların müzakirəsi baxımından son dərəcə əhəmiyyətli olduğu qeyd edilib.
Səfər çərçivəsində Yeni Azərbaycan Partiyası ilə Kuba Kommunist Partiyası arasında Əməkdaşlıq Sazişi də imzalanıb. Sazişi Tahir Budaqov və Xose Ramon Monteaqudo Ruiz imzalayıblar.
Partiyalar arasında çoxşaxəli işbirliyinin əsas istiqamətlərini və mühüm prioritetləri müəyyənləşdirən Əməkdaşlıq Sazişinin imzalanmasının dövlətlər arasındakı əlaqələrin mühüm tərkib hissəsi kimi partiyalararası münasibətlərdə yeni mərhələnin əsasını qoyacağı və çoxşaxəli əməkdaşlığa xidmət edən siyasi-hüquqi əsasları möhkəmləndirəcəyi vurğulanıb. İki dost ölkənin maraqlarının və hakim partiyaların ortaq hədəflərinin əks olunduğu Sazişdən irəli gələn vəzifələrin icra olunması nəticəsində ortaq hədəflərin gerçəkləşdiriləcəyinə əminlik ifadə olunub.
Nümayəndə heyəti, həmçinin Fidel Kastro Mərkəzini də ziyarət edib.
