Rusiya-Ukrayna müharibəsinin başa çatdırılması ilə bağlı Berlində ilk danışıqlar başlanıb.
AZƏRTAC xəbər verir ki, Almaniya Kansleri danışıqlarda iştirak etmək üçün Berlinə səfərə gələn Ukrayna Prezidenti Volodimir Zelenskini, eləcə də ABŞ Prezidentinin nümayəndələri Stiv Uitkof və Cared Kuşneri Kansler ofisində qarşılayıb.
Yerli medianın məlimatına əsasən, Kansler Fridrix Merts Ukrayna-ABŞ danışıqlarında birbaşa iştirak etmir. Lakin Kanslerin xarici siyasət məsələləri üzrə müşaviri görüşdə iştirak edir. Məsləhətləşmələrin gecə saatlarınadək davam edə biləcəyi gözlənilir.
Kansler görüş barədə X platformasındakı paylaşımında bildirib: “Biz Ukraynada dayanıqlı və uzunmüddətli sülhün bərqərar olmasını istəyirik. Qarşımızda mürəkkəb və çətin məsələlər dayanır, lakin irəliləməkdə qətiyyətliyik. Ukraynanın maraqları, eyni zamanda, Avropanın maraqlarıdır”.
Qeyd edək ki, dekabrın 15-də Kansler Fridrix Merts və Prezident Volodimir Zelenski, ABŞ Prezidentinin nümayəndələri Stiv Uitkof və Cared Kuşner, Fransa Prezidenti Emmanuel Makron, Böyük Britaniyanın Baş naziri Keir Starmer eləcə də Avropa İttifaqının və NATO-nun yüksəkvəzifəli rəsmiləri Berlində sülh danışıqlarına dair müzakirələr aparacaqlar.
Berlin ABŞ-ın 28 maddəlik sül planının açıqlanmasından sonra ilk dəfə danışıqların mərkəzi kimi çıxış edir. Bu danışıqlar Avropa üçün sülh müzakirələrində fəal rol almaq baxımından önəmlidir. Bununla da, Avropa prosesdə yenidən fəal iştirakını təsdiqləmiş olur. Almaniya Kansleri Fridrix Merts dəfələrlə vurğulayıb ki, avropalılar sülh danışıqlarının bir hissəsi olmalıdır. O, bir neçə gün əvvəl NATO-nun Baş katibi Mark Rutte ilə Berlində keçirilən görüşdən sonra mətbuata açıqlamasında Avropanın iştirakı olmadan hər hansı sülh razılaşmasının mümkünsüzlüyünü ifadə etmişdi.
Ukrayna Prezidenti isə Berlin görüşü ərəfəsində açıqlamasında kompromislərə açıq olduğunu, ölkəsinin NATO üzvlüyündən imtina etməsinin əvəzində ABŞ-dan və Avropadan təhlükəsizlik təminatları gözlədiyini ifadə edib.
Sabah, həmçinin 8-ci Almaniya-Ukrayna İqtisadi Forumu da keçiriləcək. Fridrix Merts və Volodimir Zelenskinin qatılacaqları Forumda xüsusilə ikitərəfli iqtisadi əlaqələr və bu əməkdaşlığın Ukraynanın dəstəklənməsində rolu müzakirə olunacaq.
jpg_1768666632.jpg)
