Azərbaycan bir çox qlobal əhəmiyyətli tədbirlərə ev sahibliyi edir. Ötən il ölkəmizdə COP29 konfransı uğurla keçirilib. Bu ilin may ayında Bakıda Ümumdünya Şəhərsalma Forumunun On Üçüncü Sessiyası (WUF13) təşkil olunacaq. Daha sonra İslam İnkişaf Bankının illik toplantısı və Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) zirvə toplantısı da məhz paytaxtımızda keçiriləcək. Bütün bunlar Azərbaycanın xüsusilə Avrasiya regionunda qlobal diplomatiyanın mərkəzlərindən birinə çevrildiyini göstərir.
Bu fikirləri AZƏRTAC-a məxsusi müsahibəsində xarici işlər nazirinin müavini, COP29-un baş danışıqçısı Yalçın Rəfiyev bildirib.
Nazir müavini qeyd edib ki, bu tədbirlər müxtəlif ölkələrin nümayəndələrini bir araya gətirməklə yanaşı, qlobal əhəmiyyət kəsb edən mövzuların müzakirəsi üçün mühüm platforma rolunu oynayır.
“Seçilən mövzular da qlobal əhəmiyyət daşıyır. Məsələn, XIII Bakı Qlobal Forum çərçivəsində iqlim və şəhərsalma mövzularına həsr olunmuş tədbirlər keçirildi. Bu müzakirələr qlobal səviyyədə həmin istiqamətlər üzrə aparılan debatlara töhfə vermək məqsədi daşıyır”, - deyə Yalçın Rəfiyev bildirib.
Nazir müavini əlavə edib ki, Bakıda keçirilən tədbirdə COP31-in sədri, Türkiyənin ətraf mühit, şəhərsalma və iqlim dəyişikliyi naziri Murat Kurum, COP31 sədrliyinin yüksək səviyyəli iqlim çempionu Səməd Ağırbaş da iştirak ediblər. Onun sözlərinə görə, səfərin əsas məqsədi COP31-in vizyonunu Azərbaycan ictimaiyyətinə, xüsusilə qeyri-hökumət təşkilatlarının nümayəndələri və gənclərə təqdim etmək, onların suallarını cavablandırmaq olub.
Y.Rəfiyev qeyd edib ki, belə görüşlər qarşıdan gələn COP konfranslarının və digər beynəlxalq forumların nəticələrinə töhfə verir və müzakirələrin daha da zənginləşməsinə xidmət edir.
Azərbaycan ilə Türkiyə arasında COP prosesi çərçivəsində sıx əməkdaşlıq qurulduğunu deyən nazir müavini bildirib ki, artıq bu ilin əvvəlindən tərəflər arasında intensiv koordinasiya aparılır.
“COP31 sədrliyi ilə artıq iki dəfə İstanbulda əlaqələndirmə görüşlərimiz keçirilib. Həm Türkiyənin COP31 sədrliyi, həm də hazırkı Braziliya sədrliyi ilə növbəti COP konfransları haqqında strategiyalar müzakirə olunub. Uğur əldə etməyin yolları və bu istiqamətdə birlikdə necə işləyə biləcəyimiz barədə fikir mübadiləsi aparılıb”, - deyə nazir müavini vurğulayıb.
Yalçın Rəfiyevin sözlərinə görə, qarşıdakı dövrdə də tərəflər bu istiqamətdə sıx və intensiv əməkdaşlığı davam etdirəcəklər.
Nazir müavini, həmçinin Türkiyə tərəfinin COP31 çərçivəsində gənclərin daha fəal iştirakını təmin etmək niyyətində olduğunu diqqətə çatdırıb.
“Qarşıdan gələn COP-un gənclərin ən çox iştirak etdiyi konfranslardan birinə çevrilməsi məqsədi var. Bugünkü görüşdə iştirak edən gənclərin mövzuya marağı da göstərir ki, onların COP prosesində fəal iştirakı yekun nəticələrin daha uğurlu olmasına töhfə verir”, – deyə Y.Rəfiyev əlavə edib.
jpg_1775472819.jpg)
