UEFA FIFA-nın intizam qərarı ilə bağlı bəyanat yayıb.
AZƏRTAC Avropa futbol qurumunun rəsmi saytına istinadla xəbər verir ki, qurum dünya çempionatında qırmızı vərəqə alan ABŞ millisinin futbolçusu Folarin Baloqunun bir oyunluq cəzasının bir il sınaq müddəti ilə əvəzlənməsi qərarını kəskin tənqid edib.
Bəyanatda bildirilib ki, futbolun əsasını ədalətli, dürüst və şəffaf rəqabəti təmin edən qaydalar təşkil edir. Qeyd olunub ki, qırmızı vərəqə alan oyunçunun minimum bir oyunluq cəzası avtomatik tətbiq olunmalı, bununla bağlı istisnaya yol verilməməlidir.
Qurum vurğulayıb ki, belə bir qərarın turnirin gedişində qəbul edilməsi eyni vəziyyətlə üzləşərək cəzalarını çəkmiş digər futbolçulara qarşı ədalətsizlikdir. Bəyanata əsasən, bu addım yarışın bütövlüyünə və etibarlılığına xələl gətirir.
UEFA, həmçinin qeyd edib ki, xüsusilə dünya çempionatı kimi nüfuzlu turnirlərdə qəbul olunan qərarlar bütövlükdə futbolun gələcəyinə müsbət və ya mənfi təsir göstərə bilər.
Sonda UEFA FIFA-nın qərarını "görünməmiş, anlaşılmaz və əsaslandırılması mümkün olmayan addım" kimi qiymətləndirərək, buna görə ciddi narahatlığını ifadə edib.
Xatırladaq ki, Folarin Baloqun dünya çempionatının 1/16 final mərhələsində Bosniya və Herseqovina ilə keçirilən oyunda rəqib futbolçuya qarşı kobud qayda pozuntusuna görə birbaşa qırmızı vərəqə alıb. FIFA isə futbolçuya tətbiq olunmalı olan bir oyunluq cəzanın icrasını təxirə salıb və onu bir il sınaq müddəti ilə əvəzləyib. Bu səbəbdən ABŞ millisinin hücumçusu Belçikaya qarşı 1/8 final görüşündə meydana çıxa biləcək.
