"Azərbaycanın türk dövlətləri ilə əlaqələri
davamlı olaraq güclənir. Türkmənistan ilə
Azərbaycan arasında münasibətlərin qədim tarixi var. Azərbaycanlıları və türkmənləri
eyni kök, mədəniyyət, qədim tarixi ənənələr, eyni zamanda dil və din eyniliyi
birləşdirir".
Bu sözləri "Azərbaycan" qəzetinə
Milli Məclisin deputatı Sevinc Fətəliyeva deyib. Prezident İlham Əliyevin Türkmənistana
səfərinin əlaqələrin inkişafı baxımından böyük önəm kəsb etdiyini bildirən
deputat bildirib ki, xalqlarımızı dərin qardaşlıq ənənələri birləşdirir və müstəqillik
dövründə əlaqələr daha da güclənib. Ölkələrimiz bir çox sahələrdə uğurla əməkdaşlıq
edir və hər iki ölkə qarşılıqlı əlaqələrin daha da gücləndirilməsi baxımından
ortaya siyasi iradə qoyur. "Azərbaycan ilə Türkmənistan arasında yüksəksəviyyəli
siyasi dialoq qarşılıqlı hörmət və bərabərhüquqluluq prinsiplərinə söykənir.
Ölkə rəhbərlərinin bir-birinə qarşılıqlı hörməti, aktual siyasi məsələlərə
koordinasiyalı yanaşma münasibətlərimizin təməlini təşkil edir. Türkmənistan
Xalq Məsləhətinin Sədri Qurbanqulu Berdiməhəmmədovun iyul ayında ölkəmizə gerçəkləşən
səfəri də bu reallığı ifadə edir", - deyə o bildirib.
S.Fətəliyevanın sözlərinə görə, Xəzər dənizi
regionunda yerləşən Türkmənistan və Azərbaycan enerji resursları baxımından zəngin
ölkələrdir. Xüsusilə qaz ixracı sahəsində əməkdaşlıq ölkələrimizi birləşdirən əsas
sahələrdən biridir. 2021-ci ildə Türkmənistan və Azərbaycan arasında Xəzər dənizindəki
"Dostluq" neft yatağının birgə işlənilməsinə dair razılıq əldə
olunub. Bu razılaşma Xəzərin hüquqi statusu məsələlərinin həllindən sonra
energetika sahəsində yeni imkanların açılmasına təkan verib. Məhz həmin sənəd
yalnız iqtisadi deyil, həm də siyasi inamın rəmzidir.
Deputat qeyd edib ki, ən mühüm məqamlardan
biri türk dövlətləri arasında üçtərəfli platformaların yaradılmasıdır: "Bu
baxımdan avqustun 22-də Türkmənbaşı şəhərində Türkmənistan, Azərbaycan və Özbəkistan
arasında yüksəksəviyyəli görüşün keçirilməsi xüsusi vurğulanmalıdır. Görüşdə
Prezident İlham Əliyevin dediyi kimi, bu gün biz xalqlarımızın mədəni və tarixi
yaxınlığına, ortaq dəyərlərə və strateji maraqlara əsaslanaraq, üç dost və
qardaş dövlətin əməkdaşlığı tarixində yeni bir səhifə açırıq. Eyni zamanda Azərbaycan,
Türkmənistan və Özbəkistan Şərqlə Qərbi, Şimalla Cənubu birləşdirən mühüm
geostrateji mövqeyə malikdir. Ölkələrimizin qarşısında nəqliyyat-tranzit əməkdaşlığı
sahəsində yeni vəzifələr və imkanlar durur. Üç ölkənin nəqliyyat, tranzit,
logistika istiqamətində birgə səylər göstərməsi nəinki ölkələrimiz, böyük
region üçün də mühüm əhəmiyyət daşıyacaq. Dövlətimizin başçısı mətbuata bəyanatı
zamanı qeyd etdi ki, Türkmənistan və Azərbaycan
iki qardaş ölkə kimi bundan sonra da çiyin-çiyinə irəliyə gedəcək, bütün məsələləri
dostluq, qardaşlıq şəraitində həll edəcək və nəinki ikitərəfli, çoxtərəfli əməkdaşlıq
imkanlarını da genişləndirəcək".
S.Fətəliyeva
iki qardaş türk dövlətinin Azərbaycanın işğaldan azad olunmuş ərazilərinin bərpasına
dəstək verməsinin təqdirəlayiq hal olduğunu vurğulayıb. O xatırladıb ki, Özbəkistan
Füzuli şəhərində orta məktəb inşa edib, eləcə də, ölkələrimizin birgə təşəbbüsü
ilə Xankəndidə tikiş fabriki fəaliyyət göstərir. Ötən ay isə Türkmənistan Xalq
Məsləhətinin Sədri Qurbanqulu Berdiməhəmmədov Qarabağda olarkən ölkəsinin hədiyyəsi
olaraq Füzuli şəhərində məscid tikintisi təklifini irəli sürüb. Məscidin
tikintisi üçün hazırda müvafiq işlər aparılır. Bütün bunlar qardaşlığımızı tərənnüm
edir.
Deputat sonda qeyd edib ki, üçtərəfli yüksəksəviyyəli
görüşün nəticəsi olaraq imzalanmış sənədlər
qarşılıqlı əlaqələrimizi daha da gücləndirəcək.
Əsmər QARDAŞXANOVA,
"Azərbaycan"
