Cari ilin sonunadək Türkiyədən mal və xidmət ixracı həcminin 390 milyard dollara çatdırılması planlaşdırılır. AZƏRTAC xəbər verir ki, bu hədəfi Türkiyənin Ticarət Nazirliyi açıqlayıb.
Nazirlik qeyd edib ki, əgər 2002-ci ildə Türkiyənin qlobal mal ixracında payı 0,55% idisə, bu gün həmin rəqəm 1,07% təşkil edir. Hesabat dövründə ölkənin qlobal xidmət ixracında payı 0,84%-dən 1,32%-ə yüksəlib.
Ticarət Nazirliyi bildirib ki, 2002-ci ildən 2024-cü ilə qədər Türkiyənin ümumi ixrac həcmi 7 dəfə artıb. O xatırladıb ki, ötən ilin sonunda ölkədən mal və xidmətlərin ixracının həcmi tarixi maksimum həddə - 377 milyard dollara çatıb.
Eyni zamanda, 2025-ci ilin yanvar-iyul aylarında Türkiyədən 156,4 milyard ABŞ dolları dəyərində mal və xidmətlər ixrac edilib.
2025-ci ilin ilk aylarında türk ixracatçıları üçün ən böyük bazarlar Almaniya, Böyük Britaniya, ABŞ, İtaliya və İraq olub.
Cari il üçün xidmətlərin ixracının hədəfi 121 milyard dollar müəyyən edilmişdisə, təkcə 2025-ci ilin yanvar-may aylarında bu rəqəm 40,1 milyard dollar olub.
Ankara yuxarıda qeyd olunan göstəriciləri Prezident Rəcəb Tayyib Ərdoğan hökumətinin iqtisadi siyasətinin uğurunun nəticəsi adlandırıb.
"Son 22 ildə Türkiyə iqtisadiyyatının orta artımı 5,3% təşkil edib. Ötən 10 il ərzində isə Türkiyə İƏİT məkanında artım templərinə görə liderlər sırasında olub”, -deyə nazirlikdən bildiriblər.
Ticarət Nazirliyi qlobal böhranlara və çağırışlara baxmayaraq, Türkiyədə 19 rübdür ki, fasiləsiz iqtisadi artımın qorunub saxlanıldığını vurğulayıb. O əlavə edib: “2024-cü ildə Türkiyədə ÜDM həcmi 1 trilyon 322 milyard dollar idisə, cari ilin birinci rübündə bu rəqəm artıq 1 trilyon 371 milyard dollar olub. Adambaşına düşən ÜDM 2002-ci ildəki 3608 dollardan bu ilin birinci rübündə 15 971 dollara yüksəlib”.
jpg_1776497174.jpg)
jpg_1775472819.jpg)
