Ölkəmiz üçün tranzit-logistika potensialının möhkəmləndirilməsi strateji əhəmiyyət daşıyır.
AZƏRTAC xəbər verir ki, bu barədə Qazaxıstan Prezidenti Kasım-Jomart Tokayev “Turkistan” qəzetinə müsahibəsində bildirib.
“Birbaşa dənizə çıxışı olmayan Qazaxıstan buna baxmayaraq, Avrasiya qitəsinin mərkəzində, əsas tranzit magistrallarının kəsişməsində yerləşir. Bu, ölkəmiz üçün böyük üstünlükdür və biz bundan dövlətin mənafeyi naminə istifadə etməliyik. Qazaxıstanı Avrasiyanın nəqliyyat mərkəzinə (hab) çevirmək baxışı və niyyətimiz var.
Bu baxımdan “Dostık - Moyıntı” yeni dəmir yolu magistralının istifadəyə verilməsinin əhəmiyyətini xüsusi qeyd etmək istəyərdim. Bu xətt üzrə Çinlə Avropa arasında yükdaşımaların həcmini beş dəfə artırmaq mümkün olacaq. Planlarımızda Moyıntı - Qızıljar, Bahtı - Ayagöz, Darbaza - Maktaaral yeni dəmir yollarının istismara verilməsi də var. Ümumilikdə, 2030-cu ilədək 5 min kilometr yeni dəmir yolunun tikintisini və modernləşdirilməsini, həmçinin mövcud dəmir yollarının 11 min kilometrinin təmirini nəzərdə tuturuq”, - deyə o bildirib.
Prezidentin sözlərinə görə, Mərkəz - Qərb avtomagistralının tikintisi də böyük əhəmiyyət kəsb edir. Bu yol paytaxtdan ölkənin qərb bölgələrinə məsafəni 500 kilometrdən çox qısaldacaq.
“Milli sərhədlərdən kənara çıxan geniş nəqliyyat sistemi formalaşdırmağa nail olmuşuq. Okean daşımalarından kənarda yerləşməsinə baxmayaraq, Qazaxıstan Sarı dənizdən Qara dənizə qədər uzanan yük terminalları şəbəkəsi yaradıb. Ölkəmizin ərazisindən 12 beynəlxalq nəqliyyat dəhlizi keçir: 5 dəmir yolu və 7 avtomobil dəhlizi. Bu marşrutlar vasitəsilə Çinlə Avropa arasında quru yolu ilə həyata keçirilən yükdaşımaların 85 faizi təmin olunur.
Əlbəttə, bütün bunlar asan gəlirlərə ümid edə biləcəyimiz anlamına gəlmir. Bu sahədə rəqabət getdikcə güclənir, çünki nəqliyyat və logistika geosiyasətin ayrılmaz hissəsinə çevrilib. Bu mövzu ali səviyyəli danışıqların gündəliyinə möhkəm daxil olub ki, bu da onun Qazaxıstan üçün müstəsna əhəmiyyətini müəyyənləşdirir”, - deyə Prezident vurğulayıb.
Tokayev qeyd edib ki, Qazaxıstan Çinin “Bir kəmər, Bir yol” meqalayihəsinin, “Şimal - Cənub” dəhlizinin, eləcə də Transxəzər nəqliyyat marşrutunun - Orta Dəhlizin inkişafında fəal iştirak edir.
“Dəniz limanlarına çıxışla Rusiya - Qazaxıstan - Türkmənistan - İran marşrutu üzrə daşımaları perspektivli hesab edirik. Çinin Orta Dəhlizin fəaliyyətinə qoşulmasını alqışlayırıq”, - deyə o bildirib.
jpg_1767211798.jpg)
