Bu medal bir Azərbaycan qadını kimi mənim üçün çox böyük əhəmiyyətə malikdir. Həqiqətən də çox təsirləndim. Bilirdim ki, bu tarixi hadisə - Everest (8 848 metr) və Lhotse (8 516 metr) zirvələrinə qalxmaq, elit alpinistlər sırasına düşmək dövlətimiz tərəfindən çox yüksək qiymətləndiriləcək. Əmin idim ki, bu nailiyyət ölkə rəhbərliyi və idman qurumlarının diqqətindən kənarda qalmayacaq.
Bu sözləri AZƏRTAC-a açıqlamasında Prezident İlham Əliyevin Sərəncamına əsasən, “Tərəqqi” medalı ilə təltif olunan azərbaycanlı alpinist Vəfa Musayeva deyib.
İdmançı bildirib ki, bu medala layiq görülmək onun üçün böyük şərəf və qürurdur: “Adımın həmin siyahıda olması və orada dövlətimizin başçısının imzasını görmək mənim üçün xüsusi əhəmiyyət kəsb edir. Düşünürəm ki, insan üçün onun mənsub olduğu yer, çalışdığı sahə və xüsusilə də dövlətinin lideri nümunəvi rol oynayır. Liderin xüsusiyyətləri, fəaliyyəti və insanlarda yaratdığı ruh yüksəkliyi çox önəmlidir. Hazırda çox emosionalam və fikirlərimi tam ifadə etməkdə çətinlik çəkirəm. Amma onu demək istəyirəm ki, həqiqətən çox böyük Liderimiz var və bu, bizə güc verir”.
Alpinist 44 günlük Vətən müharibəsində əldə olunan Zəfərin ona ilham verdiyini vurğulayıb: “Ali Baş Komandan İlham Əliyev 30 illik münaqişəni cəmi 44 günə, yəni çox qısa müddətdə öz siyasəti və bacarığı ilə sona çatdırdı. O, 30 il həsrətində olduğumuz torpaqları geri qaytardı. Həmin rayonlar arasında uşaqlığımın keçdiyi və illərlə həsrətini çəkdiyim Cəbrayıl da var. Everestə yola düşməzdən əvvəl Cəbrayıla, kəndimizə getdim. Orada çox dərin emosiyalar yaşadım və öz-özümə dedim ki, əgər bizim Liderimiz 44 günə xalqımız üçün bu qədər böyük qələbə qazandısa, mən də 44 yaşımda bir Azərbaycan qadını olaraq əlimdən gələni etməliyəm. Elə bu fikirlərlə yola çıxdım. Ona görə də “44” rəqəmi mənim üçün hər baxımdan xüsusi və dəyərlidir. Tarix boyu Azərbaycan qadınları həmişə nümunəvi olublar. Sevinirəm ki, bu gün o nümunəni davam etdirənlər sırasında mən də varam”.
V. Musayeva “Tərəqqi” medalının bundan sonrakı fəaliyyətində onun üçün böyük məsuliyyət olduğunu bildirib: “Bu medal daim xatırladacaq ki, Vətənimin başını uca saxlamaq və ona layiqli vətəndaş kimi xidmət etmək mənim borcumdur. Bu, mənim üçün həm simvol, həm də dəyərli nişanə olacaq. Həm Azərbaycan müəllimi, həm alpinist, həm də qadın və ana kimi bu medala layiq görüldüyüm üçün sonsuz qürur hissi keçirirəm. Göstərilən diqqətə görə bütün qəlbimlə təşəkkür edirəm”.
