Vətən, torpaq uğrunda ölümün gözünə dik baxaraq özünü odun-alovun içinə atıb şəhidlik zirvəsinə ucalan qəhrəmanlardan biri də leytenant Əli Rüstəm oğlu Babazadədir.
Astara elinin igid oğlu 2023-cü ilin sentyabr ayında Azərbaycanın ərazi bütövlüyünün və suverenliyinin bərpası istiqamətində həyata keçirilən lokal xarakterli antiterror tədbirləri zamanı yağıya qan qusdurmaqla adını tarixə yazıb. İndi Astara camaatı kiçikli, böyüklü Əlini özlərinə qürur yeri, iftixar mənbəyi bilirlər. Ölümsüzlüyə qovuşan qəhrəmanın anım mərasimində bir də bu fikirlər dilə gətirildi.
Yeni Azərbaycan Partiyası (YAP) Astara rayon təşkilatının sədri Həbib Cəfərovun, aparat əməkdaşlarının, Astara Rayon İcra Hakimiyyəti aparatının sektor müdiri Nihad Allahverdiyevin, Astara rayon Təhsil Sektorunun müdiri Xədicə Əliyevanın, rayon mərkəzi xəstəxanasının direktoru Bahadır Əhmədovun, qazi və şəhid ailələrinin, döyüş yoldaşlarının, eləcə də ictimaiyyət nümayəndələrinin qatıldığı tədbirdə əvvəlcə göstərdiyi hünərlə Vətənin qürur yeri olan Əli Babazadənin məzarı ziyarət edilib, onun əziz xatirəsi ehtiramla anılıb.
Sonra yığıncaqda çıxış edənlər Əli Babazadənin Vətən qarşısındakı xidmətlərindən, şəhidlik zirvəsinə ucalan qəhrəman oğullarımızın həyat yolunun gənc nəslə nümunə olmasından bəhs ediblər.
Qeyd olunub ki, Azərbaycanın ərazi bütövlüyünün və suverenliyinin bərpası uğrunda canından keçən Vətən şəhidlərinin əziz xatirəsi daim ürəklərdə yaşayacaq, qəhrəmanlıqları gələcək nəsillər üçün Vətənə sədaqət və fədakarlıq örnəyinə dönəcək.
Zəfər ORUCOÜLU
677jpg_1790033437.jpg)
