Fransa televiziyasında Prezident Emmanuel Makronla müsahibə zamanı onun haqqında süni intellektlə yaradılmış videoçarx yayımlanıb.
AZƏRTAC xəbər verir ki, fransız və hind jurnalistlərə müsahibə zamanı nümayiş olunan videoçarx sürətlə yayılıb. Lakin bu hal internet istifadəçiləri, o cümlədən ölkənin siyasi xadimləri tərəfindən sərt tənqid edilib. E.Makronun gülərək qarşıladığı videoçarxın, əslində, gülüş doğurmadığı və bu halın ölkə üçün rüsvayçılıq olduğu deyilib.
Sağçı Marion Mareşal X sosial şəbəkəsində bildirib ki, ölkə artıq çökür. Prezident isə sosial şəbəkələrdə zarafatlaşır və dövləti biabır edir. Keçmiş nazir Filipp dö Vilye E.Makronun tənəzzülündən danışıb. “O, öz riyakarlığı ilə bizi rüsvay edir. O, getməlidir”, - deyə sabiq nazir vurğulayıb. “Makron çarəsizdir. Görünür ki, o, investisiya istiqrazlarına sərmayə qoyur. Heç bir əsaslı məsələ həll olunmur”, - deyə “Əyilməz Fransa” Partiyasının yaradıcısı Jan-Lük Melanşon vurğulayıb.
İqtisadçı Filip Mürer isə müsahibə zamanı qeydə alınanlara jurnalistlərin reaksiya verməmələrinə təəccüblənib. O, eyni zamanda, E.Makronun “biz heç vaxt ölkəni bu qədər sənayeləşdirməmişik” fikrinə cavab verib. Statistika və İqtisadi Araşdırmalar Milli İnstitutunun məlumatına istinad edərək, Fransada sənaye istehsalının 2017-ci illə müqayisədə 6 faiz azaldığını diqqətə çatdırıb. Həmçinin qeyd olunub ki, televiziya ilə çıxışı zamanı E.Makron amerikalı həmkarı Donald Trampın 500 milyardlıq planına “ekvivalent” planı ilə öyünərək, Fransada süni intellektə 109 milyard sərmayə yatırıldığını açıqlayıb. Lakin onun yüksəkdən səsləndirdiyi bu göstərici, əslində, həqiqəti əks etdirmir. Çünki bu sərmayəyə xarici kapital, o cümlədən Birləşmiş Ərəb Əmirliklərinin 30-50 milyard, Kanadanın isə 20 milyard avrosu da daxildir.
Sadalananlarla yanaşı, bildirilib ki, süni intellektə görə dərhal vəsait tapan E.Makron xəstəxanalar və məktəblər üçün pul tapa bilmir.
jpg_1775472819.jpg)
