2040-cı ilə qədər Bakıda yaşayış fondunun ümumi sahəsi 2020-ci illə müqayisədə 64 faiz artırılaraq 47 milyon kvadrat metrdən 78 milyon kvadrat metrə çatdırılacaq. 2027-ci ilə qədər isə paytaxtda yaşayış fondunun ümumi sahəsi 39 faiz artırılacaq və 66 milyon kvadrat metr təşkil edəcək. Lakin təəssüflər olsun ki, açıq mənbələrdə köhnəlmiş əmlakların hansı hissəsinin mənzil, yaxud yaşayış fonduna aid olmasına dair müfəssəl məlumatlar göstərilməyib.
AZƏRTAC xəbər verir ki, bunu Sosial Tədqiqatlar Mərkəzində "Bakı şəhərində mövcud mənzil fondunun inkişafında yeni gözləntilər" mövzusunda keçirilən konfransda mərkəzin sədri, Milli Məclisin deputatı Zahid Oruc bildirib.
O deyib ki, ekspertlərin rəyinə görə, mənzil fondunun sürətlə böyüməsi əhalinin məskunlaşmasını da gücləndirir: "Ərazidə iqtisadi şərtlər daşınmaz əmlaka sərmayə qoyuluşunun artmasını və mənzil tikintisinin vüsət almasını şərtləndirir. Məsələn, kirayə mənzillərə tələbatın böyük olduğu iri şəhərlərdə vətəndaşlar sərəncamlarındakı sərbəst kapitalı mənzil sektoruna investisiya edirlər. Lakin əhali axını Bakının mənzil bazarına təzyiqləri artırır. Yaşayış fondlarının yaradılmasında bölgələrarası fərqin səbəblərindən biri də budur. 2009-2020-ci illərdə Abşeron rayonu üzrə mənzil fondunun ümumi sahəsi 140 faiz artdığı halda, bu göstərici ölkə üzrə 24, bir sıra bölgələrdə isə 20 faiz intervalında dəyişib. Əhalinin 1000 nəfərinə düşən mənzillərin sayına görə bölgələr arasında fərq 4 dəfədən çoxdur".
Onun sözlərinə görə, daşınmaz əmlak bazarında dinamikliyin müşahidə olunduğu indiki dövrdə tikinti biznesinin reputasiyasını yüksək tutan və müştərilərdə məmnuniyyət yaradan onlarla milli şirkət mövcuddur. Lakin qanunsuz əməliyyatlarla vətəndaşların haqlı mənafeyinə ziyan vuran qurumlar da az deyil. Son 10 ildə 20-dən artıq tikinti şirkətinin rəhbərinin cinayət məsuliyyətinə cəlb edilməsi deyilənləri təsdiqləyir. “Tikinti və Şəhərsalma Məcəlləsində yenilənən ərazilərdə vətəndaşlarla razılaşmanın müddətinin qoyulmaması maliyyə itkilərinə yol açır. Kirayə ödənişləri, nəqliyyat, layihə, planlaşdırma və işçi qüvvəsini səfərbər edən tikinti şirkəti azsaylı mənzil, mülk və ev sahibləri ilə razılaşmaya gedə bilmədiyi halda aylarla, bəzən illərlə uzanan mübahisələr artıq anlaşmaya gedən vətəndaşların haqlı narazılığına səbəb olur, proses domino effekti ilə mənfi istiqamətdə inkişaf edir. Halbuki ağlabatan müddət çərçivəsi olsaydı, paytaxtın mənzil fondunun yenilənməsi ajiotaj və narazılıq deyil, qarşılıqlı məmnuniyyət doğurardı. Ümidvarıq ki, hökumət və qanunvericilik orqanı, biznes strukturları, vətəndaş cəmiyyəti, o cümlədən sahəvi qurumlar problemlərin həlli üçün daimi dialoq və həll yolları tapacaqlar. Əlbəttə, tikinti sektorunda tənzimləmə və nəzarət çox önəmlidir. Çünki insanların təhlükəsizliyi konstitusion vəzifədir", - deyə o əlavə edib.
jpg_1750146983.jpg)
jpg_1749076194.jpg)
