Bu, əhalinin rifahının daha da yüksəlməsinə xidmət edir
İqtisadiyyatımız inkişaf etdikcə, ölkəmizin potensialı artdıqca başqa sahələrdə olduğu kimi, sosial sahədə də uğurlu dövlət siyasəti aparılır, insanların rifah halının davamlı yüksəlməsinə xidmət edən islahatlar həyata keçirilir, müsbət nəticələr əldə olunur.
Sosial sahədə həyata keçirilən uğurlu siyasət nəticəsində əhalinin rifah halı, güzəranı gündən-günə yaxşılaşır. Gələcək firavan günlərin təməli qoyulur. Ölkə əhalisinin rifah halının yaxşılaşdırılması istiqamətində həyata keçirilən sosial-iqtisadi siyasət nəticəsində son illər ciddi irəliləyişlərə nail olunmuşdur. Əhalinin sosial müdafiəsi nəzərəçarpacaq dərəcədə gücləndirilmiş, sosial ödənişlərin və əməkhaqlarının artırılması istiqamətində uğurlu addımlar atılmışdır. Atılan bu addımlar isə əhalinin sosial rifahının daha da yaxşılaşdırılmasına əlverişli zəmin yaratmışdır. Dövlətimizin uğurla həyata keçirdiyi sosial siyasət nəticəsində əhalinin rifahının yüksəlməsi sayəsində yoxsulluğun səviyyəsi əhəmiyyətli dərəcədə aşağı düşmüşdür.
Əhalinin sosial rifahının artırılması istiqamətində nəzərdə tutulmuş bütün dövlət proqramları, layihələr uğurla və vaxtlı-vaxtında həyata keçirilir. Prezident İlham Əliyev çıxışlarının birində bu vacib məsələyə toxunaraq demişdir: "Sosial sahədə bütün proqramlar icra edilir. Baxmayaraq ki, bizim gəlirlərimiz azalıb, bu, təbiidir. Ancaq bütün sosial proqramlar vaxtında icra edilir və bu da siyasətimizin əlamətidir. Bizim siyasətimizin mərkəzində Azərbaycan vətəndaşı dayanır və heç bir sosial proqram heç vaxt ixtisar olunmayacaq, əksinə, biz yeni təşəbbüslər haqqında fikirləşirik".
Sosial sahədə islahatlar davamlı olaraq həyata keçirilir. Bu islahatların həyata keçirilməsində əsas məqsəd xalqımızın güzəranının daha da yaxşılaşdırılmasıdır. Sosial müdafiəyə ayrılan dövlət büdcəsinin həcmi ildən-ilə artırılır. Buna görə də xalqımızın sosial müdafiəsi gündən-günə güclənir. Bütün bunlar bir daha onu göstərir ki, ölkəmizdə əhalinin sosial rifahının gücləndirilməsi dövlət siyasətinin başlıca məqsədini təşkil edir.
Ölkəmizdə həyata keçirilən sosial layihələr, proqramlar vətəndaşlarımız tərəfindən də böyük razılıq və rəğbətlə qarşılanır. Başqa sahələrdə olduğu kimi, əhalinin sağlamlığının qorunması istiqamətində də mühüm addımlar atılır, bir-birindən səmərəli layihələr həyata keçirilir. Uğurla icra olunan bu layihələr əhalinin sosial müdafiəsinin daha da gücləndirilməsində mühüm rol oynayır. Əməkhaqları və pensiyalar, sosial müavinətlər, təqaüdlər mütəmadi olaraq artırılır. Şəhid ailələrinin, əlillərin və müharibə veteranlarının həyat tərzinin yaxşılaşdırılması istiqamətində olduqca zəruri tədbirlər həyata keçirilir. Bütün bu müsbət dəyişikliklər, qazanılan uğurlar dövlət başçımızın xalqımıza olan sonsuz sevgisinin, diqqət və qayğısının parlaq göstəricisidir.
Hər il həm əməkhaqları və təqaüdlər artırılır. Prezident İlham Əliyev 7 yanvar 2025-ci ildə yerli televiziya kanallarına verdiyi müsahibəsində bu vacib məsələyə də toxunmuşdur. Dövlət başçısı demişdir ki, bildiyiniz kimi, bu il yanvarın 1-dən minimum əməkhaqqı 55 manat artıb və 400 manata çatıb. Minimum pensiya 40 manat artıb və 320 manata çatıb. Orta hesabla artım 14-15 faizdir. Bu qədər böyük sərmayə qoyan və Qarabağın bərpası kimi qarşımızda böyük problemi olan ölkədə bu sahəyə də diqqət yetirmək, əlbəttə ki, bizim siyasətimizin mahiyyətini göstərir. Yəni Azərbaycan vətəndaşları ildən-ilə daha yaxşı yaşamalıdırlar. Əgər biz bu artımı inflyasiyanın dərəcəsi ilə müqayisə etsək, - hansı ki, keçən il 2 faizdən bir qədər çox idi, - yəni bu artım məhz az müdafiə olunan təbəqə üçün dövlət tərəfindən növbəti yardımdır. "Hər şey cəmiyyətdə də, siyasətdə də, ailədə də ədalətli olmalıdır və sosial ədalət prinsipləri həmişə bizim üçün vacib olub. İmkan yarandıqca biz ilk növbədə bu sahəni də, necə deyərlər, diqqətdə saxlamışıq. Son bir neçə il ərzində dörd sosial paket həyata keçirildi və bu məqsədlər üçün 7 milyard manatdan çox vəsait xərcləndi. Bundan sonra da sosial və iqtisadi inkişaf yanbayan gedəcək. İqtisadi imkanlar artdıqca biz daim sosial məsələlərin həllinə - minimum əməkhaqqı, pensiya, sosial müavinətlərin artırılması məsələlərinə də daim diqqət göstərəcəyik".
Ölkəmizdə sosial sahənin inkişaf etdirilməsinə böyük önəm verilir. Bu sahənin inkişafı, tərəqqisi daim diqqətdə saxlanılır, müəyyən layihələr həyata keçirilir. Zamanında reallaşdırılan layihələr, aparılan islahatlar müsbət nəticələr əldə etməyə əlverişli şərait yaradır. Sosial müdafiə sahəsinə ayrılan dövlət büdcəsinin həcmi daim artırılır. Sosial siyasət dövlət tərəfindən müvafiq qanun və dövlət proqramları ilə tənzimlənir və vaxtlı-vaxtında icra olunur.
İldən-ilə ölkə büdcəsinin artırılması sosial proqramların həyata keçirilməsi üçün əlverişli şərait yaradır. Prezident İlham Əliyev yerli televiziya kanallarına verdiyi müsahibəsində bu barədə də danışıb. Dövlətimizin başçısı deyib: "Əlbəttə ki, büdcə parametrləri də hər bir ölkənin iqtisadi potensialını əks etdirir: həm parametrlər, həm dinamika. Bu ilin büdcəsi rekord səviyyədədir. Büdcə xərcləri 41 milyard manatdan çoxdur. İcmal büdcə isə 48 milyard manatı ötüb. Yəni Azərbaycan tarixində bu qədər böyük büdcə olmayıb. Bütün bu amilləri sadalayaraq bir daha göstərmək istəyirəm ki, biz yalnız daxili resurslar hesabına, şəffaflıq, idarəetmə və düzgün iqtisadi siyasət nəticəsində bu nəticələrə çatmışıq. Mən dəfələrlə bildirmişdim və artıq hesab edirəm ki, bunu hər kəs görür, hər bir ölkənin siyasi müstəqilliyi onun iqtisadi müstəqilliyindən asılıdır. Yəni iqtisadi cəhətdən, maliyyə məsələləri cəhətindən əgər heç kimdən asılı deyilsənsə, sən müstəqil siyasət apara bilərsən. Ona görə bütövlükdə, əlbəttə ki, bir çox digər parametrlər var. Amma əsas iqtisadi göstəricilər bundan ibarətdir. Təbii ki, bu, bizə imkan verir ki, sosial proqramları daha fəal icra edək".
Göründüyü kimi, 2025-ci il büdcəsinin artırılması sosial sahənin inkişafına, dövlət proqramlarının uğurla həyata keçirilməsinə böyük təkan verəcək. Deməli, bu il əhalinin sosial rifahı daha da yüksələcək, xalqımızın güzəranı günbəgün yaxşılaşacaq.
Vahid MƏHƏRRƏMOV,
"Azərbaycan"
