Etimad səsverməsinə az qalmış ictimai rəy sorğularında, eləcə də siyasi dairələrdə Fransua Bayru hökumətinə qarşı çıxanların sayı artır. ELABE İnstitutunun BFMTV üçün keçirdiyi sorğuya əsasən, fransızların əksəriyyəti hökumətin etimad qazana bilməyəcəyini arzulayır. Sol partiyalar və ifrat sağçı Milli Birlik (RN) artıq Fransua Bayruya dəstək verməyəcəklərini bəyan ediblər.
AZƏRTAC xəbər verir ki, sentyabrın 8-nə təyin olunmuş etimad səsverməsinə az qalmış Baş nazir Fransua Bayru ictimai və siyasi təzyiqlərlə üzləşir. Onun təklif etdiyi təxminən 44 milyard avro dəyərində büdcə qənaəti planı rədd edilib və sentyabrın 10-da ölkə miqyasında tətil çağırışları səsləndirilib. Bu vəziyyətdə o, Prezident Emmanuel Makrona müraciət edərək, fövqəladə parlament sessiyasının çağırılmasını və ümumi siyasi kurs barədə bəyanat əsasında parlamentdən etimad almaq istəyini bildirib.
Müxalifət dəstək verməyəcəyini açıq şəkildə ifadə etdiyi kimi, ictimai rəy də Bayrunun tərəfində deyil. ELABE-nin son sorğusuna görə, fransızların 72 faizi, yəni, dörddə üçə qədəri, hökumətin Milli Assambleyada etimad qazanmasını istəmir. Yalnız 27 faiz respondent deputatların Bayruya dəstək verməsini arzulayır. Bu rəqəmlər hökumətin siyasi və iqtisadi vəziyyətin təcili olduğunu vurğulamasına baxmayaraq, cəmiyyətin dərin narazılığını göstərir.
Fransızlar hökumətin süqutundan çəkinmirlər. Sorğuda iştirak edənlərin 51 faizi vəziyyətin artıq çox ciddi olduğunu və daha da pisləşə biləcəyini düşünür. 22 faizi isə hökumətin devrilməsinin problemli olmayacağını bildirir. Fransua Bayrunun istefası halında isə bir çox ssenari mümkündür: yeni Baş nazirin təyin edilməsi (81 faiz), Milli Assambleyanın buraxılması və yeni parlament seçkiləri (69 faiz) və ya hətta Emmanuel Makronun istefası (67 faiz).
Dövlət başçısı bir neçə dəfə yeni buraxılma qərarından yayınmaq istədiyini desə də, ədliyyə naziri Jerald Darmanən bu ehtimalı kənara atmamaq lazım olduğunu bildirib. Sosialistlər və ekoloqlar isə Bayru hökumətinin yerinə keçməyə hazır olduqlarını bəyan ediblər.
Jan-Lük Melanşon isə daha da irəli gedərək deyib ki, Emmanuel Makron istefa verməlidir. Melanşon bildirir ki, Mişel Barnye və Fransua Bayrudan sonra Makronun üçüncü dəfə eyni siyasəti davam etdirəcək bir baş nazir təyin etməsinə imkan vermək olmaz. O, həmçinin Prezidentə qarşı yeni bir impiçment təklifi ilə Milli Assambleyaya müraciət edəcəyini açıqlayıb. Solçu partiyalar artıq bütün ssenarilərə hazırlaşırlar. Manuel Bompar isə X platformasında seçici siyahılarına yazılmağa çağırış edib.
jpg_1765830577.jpg)
jpg_1765830356.jpg)
