Yaşadığımız bu gözəl həyatda unudulmaz günlərimiz, anlarımız çox olur. Belə günlərimizdən biri də orta məktəbi bitirdiyimiz, yeni həyata ilk addımlarımızı atdığımız gündür. 
Həmin gün çalınan son zəngdir. Son zəngin sədalarını hamımız eşitmişik. O  unudulmaz anları hamımız yaşamışıq. Son zəng çalınan həmin günün, həmin anın üstündən illər karvanını səssiz-səmirsiz çəkib getsə də, onun sədaları qulaqlarımızdan heç vaxt getmir. Ömrümüzün sonuna qədər yaddaşımızda qalır. Olub-keçənləri xatırlatmaq, o anların sevincini təzədən bizə yaşatmaq üçün qalır.
Dünən Azərbaycanın ümumtəhsil məktəblərində son zəng çalındı. Həmişə kövrək hisslərlə xatırlanacaq bu səslə şagirdlərin ömürlərinin ən şirin, duyğulu və qayğısız günlərinin keçdiyi məktəb illəri sona yetdi.  Bu zəngin sədaları qəlblərin kövrək simlərini titrətdi, könüllərə həzin sığal-tumar çəkdi. 
Başqaları üçün adi bir gün olsa da, son zəngin çalındığı gün 11-cilər üçün unudulmaz oldu. Məzunlar bir anlıq valideynlərinin əlindən tutub dərsə gəldikləri ilk günü,  çətinliklə yazdıqları hərfləri, əzbərlədikləri şeirləri,  on bir il çiyinlərində daşıdıqları məktəb çantalarını, hər gün qarşısına çıxdıqları lövhəni, onlara qələm tutmağı öyrədən müəllimləri xatırladılar. 
Son zəngin xoş və unudulmaz sədaları bu yay günündə məktəbliləri müstəqil həyata səsləyirdi. O həyata ki, şagirdlər onu illərdən bəri arzulayırmışdılar, intizarını çəkmişdilər. Əminik ki, təhsilini başa vurmuş şagirdlər ölkəmiz üçün dəyərli vətəndaş, valideynlər üçün qürurlu övlad olacaqlar, səsləri zirvələrdən gələcək, uğurları, zəfərləri ilə ad-san qazanacaqlar.

Vahid MƏHƏRRƏMOV,
"Azərbaycan"