Avropa Parlamentinə seçkilərdə məğlubiyyətdən sonra Prezident Emmanuel Makronun elan etdiyi Fransa Milli Assambleyasına (Parlamentin aşağı palatası) növbədənkənar seçkilər üzrə səsvermə başlayıb.

AZƏRTAC xəbər verir ki, bu gün seçkilərin birinci turu keçirilir. Seçki məntəqələri yerli vaxtla saat 08:00-da açılıb və səsvermə saat 18:00-a qədər davam edəcək. Təxminən 49,3 milyon vətəndaş səsvermə hüququna malikdir.

Fransa vətəndaşları parlamentin aşağı palatasına 577 deputat seçəcəklər. Mütləq çoxluq üçün 289 yer lazımdır. Son çağırışda Fransa Prezidenti Emmanuel Makronun ittifaqı cəmi 250 mandata malik olduğu üçün qanun layihələrini təsdiqləməkdə digər partiyaların dəstəyinə ehtiyac yaranırdı.

Prosedura görə, namizəd birinci turda səslərin 50 faizindən çoxunu, və ya qeydiyyatda olan seçicilərin 25 faizindən çoxunun səsini əldə edərsə, parlamentə mandat qazanır. Əks halda, iyulun 7-də ikinci tur keçiriləcək.

Seçkilərin əsas maraqlı cəhəti Avropa Parlamentinə seçkilərdə qalib gələn ifrat sağçı “Milli Birlik” partiyasının neçə mandat qazana biləcəyidir.

Bundan əlavə, solçu “Yeni xalq cəbhəsi” partiyalarının bloku, xüsusilə Makronun yaratdığı “İntibah” partiyasının daxil olduğu “Birgə” koalisiyası, eləcə də sağçı “Respublikaçılar” partiyası da seçkilərdə iştirak edir.

Cəmi 20 gün davam edən seçki kampaniyası qızğın müzakirələrlə yadda qaldı: həm sağçı populistlər, həm də solçular seçkiqabağı vədlərini reallaşdıra bilməyəcəkləri ilə bağlı ittihamlarla üzləşdilər.

Son seçkiqabağı sorğulara görə, “Milli birlik” ilk turda səslərin 40 faizini toplaya bilər ki, bu da partiyaya aşağı palatada mütləq çoxluq üçün lazım olan 289 yerlə müqayisədə 250-280 yer təmin edəcək. İkinci yeri solçular koalisiyası, üçüncü yeri isə “Birlikdə” koalisiyası tuta bilər.

Bununla belə, erkən seçkilər 2027-ci ilə qədər vəzifəsində qalacaq Makronun prezidentliyinə təsir göstərmir. Seçkilərdən sonra sağ populistlər parlamentdə mütləq çoxluğu qazansalar, o, öz partiyasının lideri Cordan Bardellanı hökumət başçısı təyin etməyə məcbur ola bilər. Bu da, öz növbəsində Marin Le Penin 2027-ci ildə prezident olmasına yol açacaq.

Fransanın daxili işlər naziri Jerar Darmanin parlament seçkilərindən sonra iğtişaşlar olacağı barədə xəbərdarlıq edib. "Səsvermənin birinci turunun axşamı və şübhəsiz ki, ikinci turun axşamı, yekun nəticələr elan edildikdə, ifrat sol və sağçılar bu fürsətdən xaos yaratmaq üçün istifadə edə bilər", -deyə nazir “France Info”ya bildirib.