Böyük Britaniya hökumətinin sıfır emissiya siyasəti Şimal dənizində onlarla neft və qaz yatağının işlənməsini əngəlləyir.
AZƏRTAC xəbər verir ki, Britaniya sularında 51 yeni yataq aşkar edilib, lakin artıq mənfəət vergisi və kəşfiyyat lisenziyalarının verilməsinə qoyulan qadağa səbəbindən onlar zərərli hala düşüb.
“The Daily Telegraph” qəzetinin məlumatına görə, “Offshore Energy UK” (OEUK) şirkətinin məlumatında təxminən 60 mövcud yatağın genişləndirilməsinin də dayandırıldığı bildirilir.
Sənaye rəsmiləri hesab edirlər ki, layihələr vergi və tənzimləyici islahatlarla bərpa edilə bilər. Xüsusilə, bu, enerji mənfəət vergisinin yenidən nəzərdən keçirilməsini əhatə edəcək.
OEUK-un baş direktoru Devid Uaythaus dəyişikliklərin investisiya cəlb edəcəyini, iş yerlərini qoruyacağını və vergi gəlirlərini artıracağını bildirib: “Təklifimiz dərhal investisiya cəlb edəcək, on minlərlə iş yerini qoruyacaq, habelə məktəblər və xəstəxanalar kimi vacib xidmətlər üçün vergi gəlirlərinin azaldılmasını deyil, artırılmasını təmin edəcək”.
Qlobal bazarda qeyri-sabitlik fonunda, xüsusən də enerji naziri Ed Milibanda istehsal məhdudiyyətlərini yumşaltmaq üçün təzyiq artır.
OEUK-un hesablamalarına görə, 111 potensial layihə 3,5 milyard barelə qədər neft və qaz hasilatına imkan yarada, həmçinin təxminən 50 milyard funt sterlinq investisiya cəlb edə bilər.
Hazırda Böyük Britaniya qazının təxminən 39 faizi Şimal dənizindən, təxminən 45 faizi Norveçdən boru kəməri ilə, qalan hissəsi isə mayeləşdirilmiş təbii qaz (LNG) kimi idxal olunur.
“Offshore Energy UK” şirkətinin hesablamalarına görə, daxili resurslardan daha səmərəli istifadə ilə idxal edilən LNG-nin payı 2035-ci ilə qədər təxminən 14 faizdən 6 faizə endirilə bilər. Səlahiyyətlilər qiymət dalğalanmalarından uzunmüddətli qorunmanın yalnız qazıntı yanacaqlarından imtina etməklə mümkün olduğunu bildirirlər.
jpg_1775470028.jpg)
