Kənd təsərrüfatının dayanıqlı inkişafına dair 2026-2030-cu illər üzrə qəbul edilmiş dövlət proqramında qarşıya qoyulan hədəflərə çatmaq üçün Şəmkirdə torpaqdan səmərəli istifadə, məhsuldarlığın və istehsalın artırılması istiqamətində mühüm addımlar atılır. 2026-cı ilin 6 ayının yekunları isə onu deməyə əsas verir ki, həmin addımlar nəticəsiz qalmır.
Cari ilin ilk yarısında Şəmkirdə kənd təsərrüfatının inkişaf dinamikası yüksək olmuşdur. Bu dövr rayon üzrə istehsal olunan kənd təsərrüfatı məhsullarının ümumi dəyəri faktiki qiymətlərlə 607 milyon 59 min manata çatmışdır ki, bu da ötən ildəkindən 2,3 faiz çoxdur. Bu rəqəmlər sadəcə quru statistika deyil. O, minlərlə şəmkirlinin gərgin əməyinin, tarlalarda və fermalarda gecə-gündüz tökülən alın tərinin göstəricisidir.
Cari mövsüm taxılçılıq sahəsində yüksək nəticələr qazanılmışdır. Rayon üzrə 5 min 303 hektar taxıl sahəsindən hər hektardan orta hesabla 37,1 sentner olmaqla 19 min 681 ton yüksəkkeyfiyyətli məhsul toplanmışdır. Bu isə ötən illə müqayisədə 27,3 faiz artım deməkdir. Cari mövsüm buğda biçilən sahə ötən ilin müvafiq dövrünə nisbətən 3,2 dəfə artaraq 1 min 442 hektara, məhsul istehsalı isə 2,8 dəfə yüksələrək 5 min 782 tona çatmışdır. Arpa istehsalı da pis olmamışdır - 3 min 861 hektardan 13 min 899 ton (keçən ilə nisbətən 3,8 faiz çox) arpa biçilmişdir.
Şəmkir həm də tərəvəzçilik və kartofçuluq rayonudur. Daxili bazarın təminatında və ixracda Şəmkir kartofu və tərəvəzi əvəzsiz rol oynayır. Cari ilin ötən dövrü ərzində tərəvəz əkilmiş sahələrin 3 min 994 hektarından rekord həcmdə - 223 min 760 ton tərəvəz yığılmışdır ki, bu da ötən illə müqayisədə 1,1 faiz çoxdur. Kartof istehsalına gəldikdə, 4 min 930 hektardan 135 min 568 ton məhsul götürülmüşdür. Rayonun meyvə bağlarında da meyvə və giləmeyvə bol olmuşdur - meyvə istehsalı 20,3 faiz artaraq 22 min 113,2 tona çatmışdır. Bostan bitkilərinin istehsalı isə 264,3 ton olmuşdur.
Yeni dövlət proqramının tələblərindən biri də əkin sahələrinin diversifikasiyası və yeni rəqabətqabiliyyətli bitki növlərinin əkin dövriyyəsinə daxil edilməsidir. Şəmkir rayonunda bu istiqamətdə də xeyli işlər görülür. Yeri gəlmişkən, qeyd edək ki, rayonun əkin strukturunda texniki bitkilərin sahəsi 1 min 187,6 hektardır. Onun da 719 hektarında günəbaxan, 379,4 hektarında şəkər çuğunduru əkilir. İnnovativ yenilik isə rayon tarixində ilk dəfə olaraq və ya yeni aqrar təşəbbüslər çərçivəsində tarlalara yeni nəfəs gətirilməsidir. Belə ki, cari il Şəmkirdə ilk dəfə olaraq 72 hektarda yerfıstığı və 17,2 hektarda xardal əkilmişdir.
Rayonda kənd təsərrüfatının ən vacib sahəsi olan heyvandarlıqda da vəziyyət yaxşıdır. Əhalinin heyvandarlıq məhsulları ilə etibarlı təminatı, həmçinin emal sənayesinin xammal bazasının möhkəmləndirilməsi istiqamətində bütün göstəricilər üzrə artım qeydə alınmışdır. Hesabat dövründə diri çəkidə 5 min 306,2 ton ət, 30 min 109,7 ton süd, 18 milyon 613 min ədəd yumurta istehsal edilmişdir. İyulun 1-i vəziyyətinə rayonda qaramalın baş sayı 56 min, qoyun və keçilərin isə 245,5 mindir. Keçən ilin müvafiq dövrü ilə müqayisədə qaramal 82, inək və camışlar 53, qoyun və keçilər isə 1700 baş artmışdır.
2026-cı ilin birinci yarısının yekunları bir daha təsdiq edir ki, Şəmkir cari ildə də kənd təsərrüfatı sahəsində yüksək uğurlara imza atacaq. Söz yox ki, əldə olunan bu nailiyyət əsası Ulu Öndər tərəfindən qoyulmuş və bu gün Prezident İlham Əliyev tərəfindən davam etdirilən aqrar islahatların, eləcə də dövlət tərəfindən tətbiq edilən subsidiyaların, texniki təminatın və güzəştli kreditlərin nəticəsidir.
Sabir ƏLİYEV,
"Azərbaycan"
