Azərbaycan Qida Təhlükəsizliyi Agentliyinin (AQTA) sədri Qoşqar Təhməzli Azərbaycan Quş Əti, Yumurta İstehsalçıları və İxracatçıları Assosiasiyasının və ölkədə fəaliyyət göstərən quşçuluq təsərrüfatlarının nümayəndələri ilə görüşüb.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, görüş quşçuluq sahəsindəki vəziyyətin bir daha nəzərdən keçirilməsi, o cümlədən aprelin 18-də Milli Məclisdə “Qida təhlükəsizliyi sistemi və onun vahid sağlamlıq konsepsiyasında rolu” mövzusunda keçirilən ictimai dinləmədə quşçuluqla bağlı səsləndirilən fikirlərin müzakirə edilməsi, eyni zamanda, bu sahədə fəaliyyət göstərən təsərrüfatların nümayəndələri ilə işin daha səmərəli təşkil olunması, onların mövcud qanunvericilik və tələblər barədə məlumatlandırılması, işlərinin beynəlxalq tələblərə uyğun təşkilinə kömək göstərilməsi, həmçinin təkliflərinin dinlənilməsi və müvafiq işlərin həyata keçirilməsinin təmin edilməsi məqsədilə təşkil olunub.
Görüş zamanı AQTA sədri qida zəncirinin bütün mərhələlərində, o cümlədən quşçuluq sahəsindəki fəaliyyətlə bağlı qarşıya qoyulan vəzifələr, bu sahədə qanunvericiliyin tələblərinə uyğun həyata keçirilən tədbirlərlə bağlı iştirakçıları məlumatlandırıb. O, şəffaflıq prinsipləri əsasında həyata keçirilən nəzarət və tənzimləmə tədbirlərinin ölkədə qida təhlükəsizliyinin təmin edilməsinə töhfə verdiyini vurğulayıb.
Azərbaycan Quş Əti, Yumurta İstehsalçıları və İxracatçıları Assosiasiyasının sədri Mürvət Həsənli dövlət tərəfindən quşçuluq sahəsinə göstərilən dəstəyə görə təşəkkürünü bildirib və bu sahədə işin daha səmərəli təşkili üçün müvafiq tədbirlərin həyata keçirildiyini diqqətə çatdırıb.
Görüşdə daha sonra diri toyuq və quş əti məhsullarının istehsalı, idxalı və ixracı məsələlərinin tənzimlənməsi ilə bağlı müzakirələr aparılıb. Həmçinin AQTA ilə Rusiya Federasiyasının Baytarlıq və Fitosanitar Nəzarət üzrə Federal Xidməti ("Rosselxoznadzor") arasında əldə edilən razılaşmaya uyğun olaraq, respublikamızdan həmin ölkəyə yumurta ixracı ilə əlaqədar məsələlər müzakirə edilib, bu sahədə mövcud olan imkanlar və perspektivlər nəzərdən keçirilib. Eyni zamanda, quşçuluq təsərrüfatlarında aparılan monitorinqlərin gedişatına dair fikir mübadiləsi aparılıb.
Görüş zamanı sahibkarların fikir və təklifləri dinlənilib, onları maraqlandıran suallar cavablandırılıb, aidiyyəti üzrə müvafiq göstərişlər verilib.
