İqlim hədəflərinə çatmaq üçün davamlılıq və balanslı yanaşmalar çox vacibdir.
AZƏRTAC xəbər verir ki, bu fikri Bolqarıstan Prezidenti Rumen Radev Bakıda keçirilən COP29 iqlim konfransında çıxışında deyib.
Prezident qlobal qiymətləndirmə nəticəsində müəyyənləşdirilən aydın istiqamətə əsaslanaraq, bu konfransın əsas nəticəsi kimi maliyyə sahəsində reallaşdırılan Yeni Kollektiv Kəmiyyət Hədəfi razılaşmasının əldə edilməsinin vacibliyini bildirib. Prezident əlavə edib ki, bu yeni hədəf, uyğunlaşma və azaldılma tədbirlərini təmin etmək üçün həm dövlət, həm də özəl sektorlardan bütün mümkün maliyyə mənbələrini təmin etməli, xüsusən həssas vəziyyətdə olan ölkələrə diqqət yetirilməlidir.
Prezident Rumen Radev iqlim dəyişikliyinin təsirlərini yüngülləşdirmək və qlobal enerji sistemlərini dekarbonlaşdırmaq üçün ambisiyaların əhəmiyyətli dərəcədə artırılmasının önəmini vurğulayıb. “Bu, təkcə bütün mövcud texnologiyaları qəbul etməklə, enerji səmərəliliyini əhəmiyyətli dərəcədə yaxşılaşdırmaqla, enerji infrastrukturunu yeniləmək və enerji təhlükəsizliyinin ən yüksək prioritet olaraq qalmasını təmin etməklə mümkün olacaq”, - deyə dövlət başçısı qeyd edib.
Bolqarıstan Prezidenti Mərkəzi və Şərqi Avropada, Balkan və Qara dəniz regional enerji əməkdaşlığı təşəbbüslərində fəal iştirak edən ölkəsinin iqlim neytrallığı, ədalətli enerji keçidi, enerji təhlükəsizliyi və aşağı karbon emissiyalı texnoloji yeniliklərə dair ortaq prioritetlərə sahib olan Avropa İttifaqı ilə digər ölkələr arasında əlaqələri gücləndirməkdə də qərarlı olduğunu bildirib.
Prezident əlavə edib ki, iqlim məsələləri ilə bağlı elm və təhsil sahələrinin inkişafına dəstək göstərilməsi vacibdir. Bolqarıstanın bu yay IPCC sessiyasına ev sahibliyi etdiyini xatırladan Rumen Radev deyib: “Elm təkcə karbon izimizi azaltmaq üçün deyil, həm də iqlim sabitliyinin pozulduğu dövrdə insan həyatını yaxşılaşdırmaq üçün açar rolunu oynayır”.
