Azərbaycanın İtaliyadakı səfirliyinin, səfirliyin tabeliyində fəaliyyət göstərən Mədəniyyət Mərkəzinin və Azərbaycan Respublikası Dövlət Neft Şirkətinin birgə təşkilatçılığı ilə Romanın məşhur “Milli Etrusk Muzeyi”ndə 28 May - Müstəqillik Günü münasibətilə tədbir təşkil olunub. Rəsmi qəbulda İtaliya rəsmiləri, parlament üzvləri, diplomatik korpusun, biznes dairələrinnin və beynəlxalq təşkilatların nümayəndələri iştirak ediblər.
Bu barədə AZƏRTAC-a Azərbaycanın İtaliyadakı səfirliyindən məlumat verilib. Bildirilib ki, Müstəqillik Gününün qeyd edilməsi ilə yanaşı, tədbir çərçivəsində həm də “SOCAR-İtaliya” şirkətinin rəsmi təqdimat mərasimi keçirilib.
Tədbirin əvvəlində Azərbaycanın və İtaliyanın Dövlət himnləri səsləndirilib.
Ölkəmizin İtaliyadakı səfiri Rəşad Aslanov çıxışında Azərbaycanın Müstəqillik Gününün tarixi önəmindən danışıb, 1918-ci il mayın 28-də müsəlman Şərqində ilk dəfə Azərbaycanda demokratik və dünyəvi dövlətin - Xalq Cümhuriyyətinin yarandığını, dünyanın bir çox ölkələrindən daha öncə məhz Azərbaycanda qadınlara səsvermə hüququnun verildiyiyini diqqətə çatdırıb. O, Cümhuriyyətin yarandığı ilk günlərdən xalq hakimiyyəti prinsiplərini rəhbər tutaraq irqi, etnik, dini və sinfi bərabərsizlikləri aradan qaldırdığını, ölkənin bütün vətəndaşlarına eyni hüquqları təmin etdiyini bildirib.
Diplomat vurğulayıb ki, ötən əsrin sonlarında ölkəmiz mürəkkəb siyasi vəziyyətlə qarşılaşsa da, Ümummilli Lider Heydər Əliyevin misilsiz xidmətləri və Ulu Öndərin layiqli davamçısı, Prezident İlham Əliyevin rəhbərliyi ilə ölkəmizin beynəlxalq nüfuzu daha da yüksəlib, Azərbaycan regionun lider dövlətinə çevrilib, COP29 və WUF13 kimi mötəbər beynəlxalq tədbirlərə yüksək səviyyədə ev sahibliyi edib. O, Ali Baş Komandanın rəhbərliyi ilə 30 ildən çox davam edən münaqişənin sona çatdığını, 2023-cü ildə dövlət suverenliyinin tam bərpa edildiyini və hazırda azad olmuş ərazilərdə geniş bərpa və yenidənqurma işləri aparıldığını tədbir iştirakçılarının diqqətinə çatdırıb. Eyni zamanda, İtaliya ilə çoxşahəli əməkdaşlığın artan templə davam etdiyini söyləyən səfir yüksəksəviyyəli səfərlərlə bu əməkdaşlığın daha da artdığını, Avropanın enerji təhlükəsizliyinin təmin edilməsində Azərbaycanın mühüm rolunu və “SOCAR İtaliya” şirkətinin İtaliyada fəaliyyətə başlamasının bunun daha bir göstəricisi olduğunu vurğulayıb.
Müstəqillik Günü ilə bağlı İtaliya hökumətinin təbriklərini çatdıran bu ölkənin xarici işlər və beynəlxalq əməkdaşlıq nazirinin müavini Edmondo Çirielli və İtaliya Senatının vitse-prezidenti senator Liçiya Rontsulli Azərbaycanın İtaliya üçün mühüm tərəfdaş ölkə olduğunu söyləyiblər.
Nazir müavini İtaliya-Azərbaycan münasibətlərinə toxunaraq dinamik inkişaf edən və strateji tərəfdaşlıq səviyyəsinə yüksələn ikitərəfli əlaqələrdən, hər iki ölkə rəhbərlərinin qarşılıqlı səfərlərinin, o cümlədən İtaliya-Azərbaycan Universitetinin açılış mərasimində iştirak etmək məqsədilə İtaliyanın Prezidenti Serco Mattarellanının 2025-ci ilin oktyabr ayında, Nazirlər Şurasının sədri Corca Meloninin cari ilin may ayının əvvəlində Azərbaycana səfərlərinin əhəmiyyətindən, bu səfərlərin ölkələrimiz arasındakı əlaqələrin inkişafına verdiyi mühüm töhfələrdən, müxtəlif sahələri əhatə edən tərəfdaşlığın inkişaf perspektivlərindən bəhs edib.
Senatın vitse-prezidenti senator Liçiya Rontsulli İtaliya ilə Azərbaycan arasında mövcud olan möhkəm siyasi, iqtisadi, humanitar, habelə parlamentlərarası əlaqələrdən söz açıb, bu münasibətlərin inkişaf etməsində Azərbaycan səfirliyinin səmərəli və aktiv fəaliyyətini yüksək qiymətləndirib. O, İtaliya ilə Azərbaycan arasında əlaqələrin bundan sonra daha da genişləyəcəyinə və möhkəmlənəcəyinə ümidvar olduğunu söyləyib.
SOCAR prezidenti Rövşən Nəcəf çıxışında Ümummilli Lider Heydər Əliyev tərəfindən əsası qoyulan və Prezident İlham Əliyevin rəhbərliyi ilə davam edən Azərbaycanın inkişaf yolundan, əldə etdiyi tarixi nailiyyətlərdən bəhs edib. Azərbaycan ilə İtaliya arasında münasibətlərin ötən illər ərzində qarşılıqlı etimad, sıx əməkdaşlıq əsasında inkişaf etdiyini bildirən R. Nəcəf “SOCAR İtaliya” şirkətinin rəsmi fəaliyyətə başlamasının, həmçinin SOCAR tərəfindən “Italiana Petroli” şirkətinin səhmlərinin alınmasının ölkələrimiz arasındakı uğurlu əməkdaşlığın göstəricisi olduğunu bildirib.
Tədbirdə tanınmış tarzən, Əməkdar artist Şəhriyar İmanov və pianoçu, caz ustası, bəstəkar Etibar Əsədli konsert proqramı ilə çıxış edib, Azərbaycanın zəngin musiqisini və caz-muğam üslubunda improvizasiyaları təqdim ediblər.
