"Növbədənkənar seçkilər işğaldan azad olunmuş ərazilərdə keçiriləcək ilk parlament seçkisi kimi tarixə düşəcək"

"Ərazi bütövlüyünü tam təmin edərək qlobal arenada ən qüdrətli dövrünə qədəm qoyan qalib Azərbaycan dövlət olaraq tarixinin qürurlu dövrünü yaşayır. 44 günlük müharibə və ardınca birgünlük antiterror tədbirləri nəticəsində Qarabağda separatizm yuvasının tam dağıdılması ilə dünyaya dövlət və millət olaraq gücümüzü göstərmiş olduq. Bunun nəticəsi kimi bu gün bayrağımız ölkəmizin bütün ərazisində dalğalanır".
Bu sözləri "Azərbaycan" qəzetinə Milli Məclisin deputatı Rəşad Mahmudov deyib. Bildirib ki, bu möhtəşəm tarixi hadisədən sonra ölkədə yaranmış yeni ictimai-siyasi vəziyyət bir sıra mühüm proseslərin reallaşdırılmasına imkan verib: "İlk dəfə olaraq ölkənin bütün ərazisində növbədənkənar prezident seçkiləri keçirilib. 30 ildən sonra işğal altında olan ərazilərdə seçicilər səsvermədə iştirak edərək vətəndaşlıq borclarını yerinə yetiriblər".
R.Mahmudov vurğulayıb ki, ölkəmiz indi növbəti mühüm ictimai-siyasi mərhələnin astanasındadır: "Azərbaycan parlament seçkilərinin keçirilməsinə hazırlaşır. Milli Məclisin hər çağırışının səlahiyyət müddəti 5 ildir, eyni zamanda Konstitusiyanın 98-ci maddəsinin II hissəsinə əsasən, növbədənkənar seçkilərdə seçilən Milli Məclisin çağırışının səlahiyyət müddəti 5 ildən az ola bilər. Bu halda növbəti seçkilər Milli Məclisin çağırışının səlahiyyət müddətinin beşinci ilinin noyabr ayında keçirilməlidir. Seçkilərin keçirilməsi müddətinin önə çəkilməsi də bir sıra mühüm məqamlarla əlaqədardır. Öncə onu demək lazımdır ki, bu, müstəqil Azərbaycanın ərazi bütövlüyü çərçivəsində, işğaldan azad olunmuş torpaqlarda keçiriləcək ilk parlament seçkisi kimi tarixə düşəcək".
Deputat qeyd edib ki, Prezident İlham Əliyevin sərəncamı ilə 6-cı çağırış Azərbaycan Respublikasının Milli Məclisinin buraxılması və növbədənkənar seçkilərin 2024-cü il sentyabrın 1-nə təyin edilməsi reallıqdan doğan zərurətdir: "İlk dəfə olaraq parlament seçkilərinin işğaldan azad edilmiş ərazilərdə də keçirilməsi ərazi bütövlüyünün qanunvericilik müstəvisində də təsdiqinin bariz nümunəsi olmaqla yanaşı, xalqımızın sürətlə inkişaf edən demokratik Azərbaycan naminə səsvermə prosesinə güclü dəstək verdiyini dünyaya nümayiş etdirəcək".
R.Mahmudov bildirib ki, parlament seçkilərinin növbədənkənar keçirilməsini şərtləndirən mühüm amillərdən biri də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının Bakıda keçirilməsinin noyabr ayına təsadüf etməsidir: "İstər Azərbaycanın, istərsə də Cənubi Qafqaz regionunun ictimai-siyasi həyatında strateji əhəmiyyətə malik belə mötəbər beynəlxalq tədbirin ölkəmizdə keçirilməsi dövlətimizə göstərilən etimadın və böyük hörmətin göstəricisidir. Digər tərəfdən, ölkəmizin üzərinə böyük məsuliyyət də düşür. 80 minə yaxın əcnəbi qonağın Azərbaycana təşrif buyuracağı və qlobal əhəmiyyətli qərarların qəbul olunacağı COP29-un yüksək səviyyədə keçirilməsi zəruriyyətini ortaya qoyur. Əlbəttə, Azərbaycan bir sıra qlobal səviyyəli tədbirlərin uğurla həyata keçirilməsi ilə tanınır və böyük təcrübəyə malikdir. Bununla belə, mühüm əhəmiyyət daşıyan parlament seçkilərinin və qlobal xarakterli tədbirin eyni vaxtda keçirilməsi məqsədəuyğun olmazdı. Eyni zamanda Kioto Protokolunun Tərəflər Görüşünün 19-cu sessiyası və Paris Sazişinin Tərəflər Görüşünün 6-cı sessiyasının da noyabr ayında Azərbaycanda keçiriləcəyi nəzərə tutulur. Təbii ki, belə mötəbər tədbirlərin Bakıda keçirilməsi dünyanın diqqətini Azərbaycana yönəldəcək və paytaxtımız minlərlə qonağı qəbul edəcək". 
Deputat qeyd edib ki, böyük təbliğat platformalarına çevriləcək bu tədbirlərin Bakıda keçirilməsi, sözsüz ki, Azərbaycanın beynəlxalq nüfuzunun daha da artmasına və postmüharibə reallıqlarının dünya ictimaiyyətinin diqqətinə çatdırılmasına şərait yaradacaq: "Bütün bunlar daha yaxşı hazırlıq tələb etməklə bərabər, digər ictimai-siyasi proseslərlə paralel aparılmamasını şərtləndirir. Buna görə də, Milli Məclisin buraxılması və növbədənkənar parlament seçkilərinin təyin edilməsi ilə bağlı təşəbbüsün deputatlar tərəfindən dəstəklənməsi reallıqdan doğan zərurətdir və ölkəmizin maraqlarına xidmət edir".

Ə.QARDAŞXANOVA,
"Azərbaycan"