Qurban bayramı bütün müsəlman ölkələrində geniş qeyd olunur. Hər il Hicri təqvimi ilə Zilhiccə ayının 10-cu günü qeyd olunan bu bayram mərhəmət, xeyriyyə və sosial yardımlaşma kimi mənəvi dəyərlərin təbliğinə xidmət edir.
Qurbanı fərdi və ya müştərək qaydada da kəsmək olar. Xırda buynuzlu heyvan fərdi qaydada, iri buynuzlu heyvanların isə müştərək qaydada kəsilməsi məqbul sayılır. Qurbanlıq heyvan hər şeydən öncə sağlam və nöqsansız olmalıdır. Qurbanlıq üçün qoyuna üstünlük verilsə də, 6-7 ayı tamam olmuş keçidən, 5 yaşı tamam olmuş dəvədən və 1 yaşı tamam olmuş inək və ya camış cinslərindən də istifadə etmək mümkündür.
Qurbanlıq heyvanların düzgün şəkildə kəsilməsi, ətin gigiyenik və sağlam şəraitdə saxlanılması da olduqca önəmlidir. Azərbaycan Respublikasının Qida Təhlükəsizliyi Agentliyi tərəfindən (AQTA) bu il Naxçıvan Muxtar Respublikası da daxil olmaqla, ölkə üzrə 135 ünvanda qurbanlıq heyvanların satışı və kəsimi məntəqəsi təşkil olunub. Onlardan 77-si həm kəsim, həm satış, 30-u satış, 28-si isə yalnız kəsim xidmətləri təqdim edir. Bəzi regionlarda səyyar heyvan kəsimi çadırları da quraşdırılmışdır.
Qida məsələləri üzrə mütəxəssis Ağa Salamovun sözlərinə görə, kəsim yerləri sanitar normativlərə riayət etməli, kəsilən heyvanlar isə baytar nəzarətindən keçirilməlidir. Kəsim zamanı istifadə edilən bıçaq və saxlama qabları yuyulub dezinfeksiya olunmalıdır. Çünki xəstəlik daşıyıcısı olan heyvanlardan insanlara sağlamlığı riskə atan bakterial, virus, parazit və göbələk xəstəlikləri keçə bilər. Xüsusilə də yay ayları ət və ət məhsullarında bakteriyaların çoxalması üçün olduqca münasib vaxtdır. Belə ki, əlverişli şəraitdə bir bakteriya 3 saat ərzində 100 milyona, 12 saatda isə 16 milyarda çata bilər.
"Havalar isti olduğu üçün ətin emal prosesi - doğranması, ətçəkən maşında çəkilməsi, bişirilməsi tez müddətdə bitməlidir. Çox vaxt əti kəsdikdən sonra onu hissələrə doğrayıb polietilen torbalara qoyurlar. Ət saatlarla onun içində qalaraq mikrobioloji çirklənməyə məruz qalır. Çalışmaq lazımdır ki, ət polietilen torbaya qoyulsa da, sərin temperaturda saxlanılsın, yəni ət boğulmasın. Heyvan kəsilən kimi əti 1-2 saat içində paylanmalıdır. Torbanın ağzı açıq qalanda da ətə hava-damcı yolu ilə bakteriyalar yığılır. Ona görə də əti sərin yerdə saxlamaq lazımdır. Çox vaxt kəsimdən sonra əti soyuducuda saxlayıb növbəti gün səhər və ya axşam paylayırlar. Bu zaman ət üst-üstə yığılır, arada istilik qalır və bakteriyaların yaranması üçün əlverişli mühit formalaşır. Ona görə də ət paketlənəndən sonra dərhal ünvana çatdırılmalıdır", - deyə mütəxəssis bildirib.
Qurban ətləri 2-4 dərəcə soyuducu temperaturunda 48 saat müddətində saxlanılıb bişirilə, dərin dondurucuda 3 aydan 5 aya qədər mühafizə edilib istifadə oluna bilər. Yeni kəsilmiş ət otaq temperaturunda uzun müddət qalmamalıdır, iki saat ərzində bişirilib süfrəyə verilməlidir.
Ülkər XASPOLADOVA,
"Azərbaycan"
