Quba Soyqırım Memorial Kompleksində "Qoruqlar və muzeylər - keçmişdən gələcəyə körpü" adlı III Quba simpoziumu keçirilib.
Tədbirdə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin şöbə müdiri Səbuhi Bəşirov, Azərbaycan Dövlət Mədəniyyət və İncəsənət Universitetinin prorektoru, Əməkdar mədəniyyət işçisi, dosent Sədaqət Əliyeva, yerli idarə-müəssisələrin rəhbərləri, ölkədə fəaliyyət göstərən mədəniyyət müəssisələrinin, eləcə də muzeylərin əməkdaşları, tarixi abidə mühafizəçiləri, ziyalılar, həmçinin gənc fəallar iştirak ediblər.
Simpozium Azərbaycan Rəssamlar İttifaqının üzvü Sahib Quliyev və Vüqar Quliyevin əsərlərindən ibarət sərgi ilə tanışlıqdan sonra öz işinə başlayıb. Giriş sözü ilə çıxış edən kompleksin direktoru Rəxşəndə Bayramova bildirib ki, Quba Soyqırım Memorial Kompleksi 2013-cü ildən fəaliyyət göstərir. 12 il ərzində 200 mindən çoxu xarici olmaqla 1 milyondan çox ziyarətçini qarşılayan kompleksdə mütəmadi olaraq simpozium, konfrans və forumlar təşkil edilir. R.Bayramova qeyd edib ki, budəfəki simpoziumun qoruq və muzey işinin inkişafı, abidələrin mühafizəsi, bələdçilik və insanlarda qoruq və muzeylərə marağın artırılmasında əhəmiyyəti böyükdür.
Çıxış edən Quba RİH başçısının müavini Səidə Abasova simpozium çərçivəsində əldə olunan bilik və təcrübələrin tətbiqi nəticəsində regionda və ölkəmizdə qoruq və muzey işinin səviyyəsinin yüksələcəyini, tarixi-mədəni irsin qorunması sahəsində uğurların artacağını vurğulayıb. Bildirilib ki, tarix və mədəniyyət abidələrinin qorunması, bərpası, təbliği, onların istifadəsi baxımından bir sıra layihələr həyata keçirilib. Bu sahədə həm beynəlxalq platformalarda, həm də ölkə səviyyəsində xeyli iş görülüb.
Rəsmi hissə bitdikdən sonra gün ərzində davam edən bölmə iclaslarında "Qoruq və muzeylərin tarixi və çağdaş rolu", "Mədəni irsin qorunması və rəqəmsallaşdırılması", "Abidələrin bərpası və konservasiyası", "Qoruq və muzey pedaqogikası və təhsil sahəsində istifadəsi", "Qoruq və muzeylərdə eksponatların təqdimatı və innovativ yanaşmalar", "Bələdçilik və ziyarətçi təcrübəsinin artırılması", "Cəmiyyətin qoruq və muzeylərə marağının artırılması və qoruq-muzey marketinqi", "Qoruq və muzey menecmenti və strateji idarəetmə", "Qoruq və muzeylərdə inklüzivlik və əlçatanlıq" və digər mövzularda elmi müzakirələr aparılıb.
80-ə yaxın elmi məqalənin təqdim olunduğu simpoziumda 100-dən çox iştirakçı iştirak edib və materiallar əsasında toplu hazırlanıb.
Akif ƏLİYEV,
"Azərbaycan"
