Kəndlərinin azad olunması ilə övladlarının ruhu şaddır

32 illik erməni işğalından sonra dinc yolla Azərbaycana qaytarılmasına qərar verilən Qızılhacılı kənd sakinlərinin də sevinci hədsizdir. Bu müddət ərzində yurd həsrəti ilə döyünən ürəkləri rahatlıq tapıb. Baxmayaraq ki, 1992-ci il mayın 11-də öz dədə-baba yurdlarından çıxmağa məcbur olan kənd sakinləri köçkünlüyə bir gün son qoyulacağına inanırdılar.
Qızılhacılılılar kəndi tərk etdikdən sonra ermənilər bütün evləri yandıraraq viran etmişlər. İşğal etdikləri digər yerlərdə olduğu kimi, bu kənddə də daşı daş üstə qoymamışlar. Oğurladıqlarını oğurlamış, talan etdiklərini talan etmiş, qalanlarını isə yandırmışlar. Sanki bilirlərmiş gec-tez bu yerləri tərk edəcəklərini.
Bütün çətinliklər arxada qalsa da , kənd sakinləri ermənilərin onlara etdikləri bu vəhşilikləri unuda bilmirlər. Belə sakinlərdən biri də Eldar Quliyevdir. Kənd ağsaqqalı deyir ki, Qarabağ müharibəsi başlayandan ailəsinə böyük zərbələr dəyib. Oğlu Babək Quliyev Birinci Qarabağ müharibəsində şəhid olub. 44 günlük Vətən müharibəsində isə nəvəsi Tural Məmmədov düşmən gülləsinə tuş gəlib: "Var olsun ordumuzu. Oğlumun və nəvəmin qanı yerdə qalmadı. Ermənilərə ağır zərbələr endirdi, torpaqlarımızı işğaldan azad etdi. İndi doğma kəndimizə qayıdacağım günü gözləyirəm. Bilirəm ki, Prezident kəndimizi yenidən tikəcək. Bax, onda ağrı-acılarımız bir xeyli azalacaq".
Kənd sakini Qəndab Hüseynovanın da oğlu Sərdar Birinci Qarabağ müharibəsində şəhid olmuşdur. Sərdar 1993-cü ildə Kəlbəcər uğrunda gedən döyüşlərdə haqq dünyasına qovuşmuşdur. Qəndab Hüseynova deyir ki, oğul Vətən sipəridir: "Vətənin dar günündə əlinə silah alaraq düşmənə qarşı vuruşan və bu yolda şəhid olan hər bir oğul xalqın qürurudur. Mənim oğlum Sərdar da qədirbilən xalqımız tərəfindən unudulmur. Tez-tez yad edilərək döyüş yolundan söhbət açılır. Belə bir oğul böyütdüyümə görə bir ana kimi fəxr edirəm. Bu gün isə keçirdiyim hissləri sözlə ifadə edə bilmirəm. 32 illik ayrılıqdan sonra kəndimizə dönəcəyik. Bundan böyük bəxtəvərlik olarmı?! Bilirəm ki, bu günlər bütün şəhidlərimizin, o cümlədən oğlum Sərdarın ruhu şaddır. Axı, qanları yerdə qalmayıb, Vətənimizin hər qarışı işğaldan azad olunub".

Sabir ƏLİYEV,
"Azərbaycan"