Gürcüstan parlament seçkiləri ərəfəsindədir. Oktyabrın 26-da keçiriləcək növbəti seçkilərə yalnız ölkənin özündə deyil, regional və qlobal müstəvidə böyük maraq var. Təsadüfi deyil ki, Gürcüstandakı parlament seçkiləri "geosiyasi seçkilər" kimi də xarakterizə olunur.
Azərbaycanın tərəfdaşı
Ondan başlayaq ki, qonşu ölkədəki seçkilər Azərbaycanda da böyük maraqla izlənilir. Çünki Gürcüstan Azərbaycan üçün dost və tərəfdaş dövlətdir. Məhz bunun nəticəsində hələ ötən əsrin 90-cı illərinin ortalarından etibarən iki dövlətin birgə siyasi iradəsi ilə mühüm iqtisadi layihələr reallaşdırılıb. Daha sonra Bakı-Tbilisi-Ceyhan və Bakı-Tbilisi-Ərzurum qaz kəmərlərinin, Bakı-Tbilisi-Qars dəmir yolu xəttinin, "Cənub qaz dəhlizi"nin inşası əlaqələrin strateji səviyyədə yüksəlməsini təmin edib. Azərbaycanın qlobal təşəbbüsləri həm də Gürcüstanı regionun tranzit dövlətinə çevirib, onun maliyyə imkanlarının yüksəlməsinə, əhalisinin sosial rifahının yaxşılaşmasına xidmət edib.
Azərbaycan, eyni zamanda Gürcütana sərmayə yatıran əsas ölkədir. SOCAR-ın xətti ilə Gürcüstanda görülən işlər bu ölkənin iqtisadiyyatının inkişafına, dövlət büdcəsinin formalaşmasına böyük töhfələr verir.
Prezident İlham Əliyevlə Gürcüstanın baş naziri İrakli Kobaxidze arasındakı şəxsi təmaslar, qarşılıqlı səfərlər, görüşlər, iki ölkə arasında münasibətlərin inkişafına böyük töhfələr verir. Azərbaycan-Gürcüstan münasibətləri, eyni zamanda regionda sülh və təhlükəsizliyin qorunmasında və möhkəmləndirilməsində böyük rol oynayır. Bu baxımdan Cənubi Qafqazın gələcəyi ilk növbədə Azərbaycan və Gürcüstandan, bu iki dövlət arasındakı münasibətlərdən asılıdır. Ona görə də qonşu ölkədəki parlament seçkilərində hazırkı hakim partiyanın qələbəsi Azərbaycanın maraqlarına uyğundur.
Parlament seçkilərinin nəticələri Qərbin avantüralarını iflasa uğradacaq
O da aydındır ki, Cənubi Qafqazda maraqları olan Qərb müxtəlif siyasi alətlərlə regiona təsir imkanlarının olmasına çalışır. ABŞ və Fransa Ermənistanda buna nail olublar. Ermənistan cəmiyyətində Soros Fondu və USAİD başda olmaqla Qərbin maraqlarına xidmət edən təşkilatların maliyyələşdirdiyi QHT və media qurumları demokratiya pərdəsi altında meydan sulayır, ictimai rəyin formalaşmasına böyük təsirlər göstərirlər.
Gürcüstanda da QHT-lərin böyük qismi Qərbin maliyyə yardımı ilə fəaliyyətdədir. Lakin son dövrlərdə Gücrüstanın xüsusi xidmət orqanları Qərbdən maliyyələşən bir sıra QHT-lərin fəaliyyətinin ölkədə qarşıdurma və ideoloji dəyişikliklər yaratmaq məqsədlərinə xidmət etdiyini müəyyənləşdiriblər. Bir neçə ay əvvəl Gürcüstanda qəbul edilən "Xarici təsirin şəffaflığı haqqında" qanun məhz həmin təşkilatların qanunsuz fəaliyyətinin qarşısına sipər çəkib. Belə ki, sözügedən qanun QHT-lərin öz maliyyələri haqqında deklarasiyalarını nəzərdə tutur. Yəni QHT-lər maliyyənin haradan və hansı məqsədlər üçün daxil olduğu barədə məlumat verməlidirlər. Bu isə Qərbin məkrli maraqlarına cavab vermədəyindən son aylarda həm ABŞ, həm Avropa İttifaqı Gürcüstana qarayaxma kampaniyasına başlayıblar. Aİ Gürcüstanın üzvlük prosesini faktiki olaraq dayandırıb. Habelə Aİ Gürcüstana yüksəksəviyyəli səfərlər etməmək və Gürcüstan hökumətinin nümayəndələri ilə Brüsseldə görüşlər keçirməmək barədə qərar qəbul edib.
"Xarici təsirin şəffaflığı haqqında" qanun isə Qərb ölkələrində də qəbul olunub. Göründüyü kimi Qərb yenə ikili standartlardan çıxış edir, bu dəfə müstəqil siyasət yürüdən Gürcüstanla bağlı məkrli mövqe ortaya qoyur. Azərbaycana olduğu kimi, Qərb siyasi dairələrinin Gürcüstana da təzyiq etməsi onun daxili işlərinə müdaxilə etməyə, onu daxili qarşıdurmaya sürükləməyə çalışır. Qarşıdan gələn seçki günü də onların ölkədə təxribatlara cəhd göstərəcəkləri istisna olunmur. Artıq Gürcüstan Dövlət Təhlükəsizlik Xidməti parlament seçkiləri ərəfəsində planlaşdırılan təxribat barədə xəbərdarlıq edib.
Əlbəttə, gürcü xalqı kimin kim olduğunu yaxşı bilir. Ona görə yaxın qonşumuz bu sınaqdan uğurla çıxacaq. Gürcüstandakı seçkilərin nəticələri Qərbin bu ölkə və Cənubi Qafqazla bağlı məkrini iflasa uğradacaq.
Rəşad CƏFƏRLİ,
"Azərbaycan"