"Oktyabrın 26-da Gürcüstanda demokratik, şəffaf və beynəlxalq standartlara uyğun parlament seçkiləri keçirildi. Seçkiləri izləyən beynəlxalq müşahidəçilərin əksəriyyətinin mövqeyi belədir. Mövqeyi fərqlənənlər isə Avropa İttifaqı, ABŞ-dən olanlardır ki, onlardan da başqa çağırışlar gəlir".
Bu sözləri "Azərbaycan" qəzetinə Milli Məclisin deputatı Elman Nəsirov deyib. O bildirib ki, onlar bununla seçki nəticələrinə kölgə salmağa çalışırlar. Eyni zamanda Qərbin Gürcüstanda hakimiyyətə gətirdiyi prezident Salome Zurabişvili tamamilə fərqli mövqedən çıxır edir və birlikdə 37,8 faiz səs toplamış 4 müxalif partiyanı öz səslərindən və mandatlarından imtinaya çağırıb. Onun bu çağırışını Qərb dəstəkləyir. Onlar heç bir halda xalqın seçdiyi, 54 faizə qədər səs toplamış "Gürcü Arzusu" partiyasının qələbəsini həzm etmək istəmirlər. "Bu, gözlənilən idi, çünki bu il mayın 28-də hakim partiya xarici agentlər haqqında qanunun qəbulunda tutduğu mövqeyə görə Qərbin qəzəbinə düçar olmuşdu. ABŞ oxşar qanunu 1938-ci ildə qəbul etmişdir, buna baxmayaraq, Gürcüstana təzyiq göstərmək, hakimiyyəti asılı vəziyyətə salmaq, diktə dili ilə danışmaq üçün bu siyasəti seçmişdi. Qərb Gürcüstanın müstəqil, öz milli maraqlarından irəli gələn siyasət yürütməsini heç bir halda qəbul edə bilmir. Onların düşüncəsinə görə belə olmamalıdır", - deyə o əlavə edib.
Deputat qeyd edib ki, Qərb düşünür ki, Gürcüstan hakimiyyəti dirijor çubuğu ilə hərəkət etməli və diktə altında fəaliyyət göstərməlidir. Qərblə yaxındırsa, Rusiya və beynəlxalq birliyin digər subyektləri ilə normal münasibətlərdə olmamalıdır. Avropa hansı istiqamətə yönəltsə, o yöndə də siyasət yürütməlidir. Bu yanaşma demokratiya ilə daban-dabana ziddir. Fikir, düşüncə plüralizminin tam əksidir və demokratiyanın fundamental prinsiplərinin üstündən xətt çəkmək anlamına gəlir. Hansı ki Qərb demokratiya məsələlərində Gürcüstanı tənqid edir.
Avropa İttifaqının yarıdan çox dövlətinin seçki nəticələrini şübhə altına aldığını vurğulayan E.Nəsirov xatırladıb ki, onlar təkrar seçkilər ideyasını ortaya atıblar: "Hətta hakimiyyəti zorla devirməyə gedəcəklərini göstərən cürbəcür şüarlar səsləndirirlər. Onlar üçün marionet hakimiyyət lazımdır. Bu baxımdan Kobaxidze hökumətinin həyata keçirdiyi siyasəti həzm edə bilmirlər. Qərb Gürcüstanda Moldovadan sonra ikinci dəfə böyük uğursuzluğa düçar oldu. Moldovada keçirilən seçkilərdə və referendumda xalqın təxminən yarısı Qərb siyasi kursunun əleyhinə səs verdi ki, bunu qətiyyən gözləmirdilər. Bu analoji proses daha kəskin şəkildə Gürcüstanda özünü göstərdi. Qərb fərqindədir ki, artıq demokratiya pərdəsi altında öz geostrateji niyyətlərini həyata keçirmək istəkləri fiaskoya uğrayır. Buna görə də təzyiq və təhdid kampaniyasına başlayırlar".
Deputat hesab edir ki, gürcü xalqı müdrikliyi sayəsində seçkilərdə olduğu kimi, Qərb dairələrinin anti-Gürcüstan siyasətini dəstəkləməyəcəklər. Xalq, əslində, sülhün lehinə səs verdi. Dörd partiyanın niyyəti faktiki olaraq Gürcüstanı ikinci Ukraynaya çevirmək idi. Bu isə Gürcüstan üçün fəlakətdir və bunu bu gün Ukrayna xalqı yaşayır. Gürcü xalqı sülhü seçərək hakim partiyaya səs verdi. Bu partiya çoxtərəfli fəaliyyət göstərərək, milli maraqlara söykənən siyasət həyata keçirir. 12 ildir bu fəaliyyəti xalq dəstəkləyir və bundan sonra da dəstəkləmək niyyətini ortaya qoydu.
Ə.QARDAŞXANOVA,
"Azərbaycan"
