Qazaxıstanın və Azərbaycanın rəhbərləri strateji əməkdaşlıq və təhsil sahəsində çox dəqiq istiqamətlər müəyyən ediblər. Elm bu vacib sahələrdən biridir və biz bu sahədə çox irəliləyiş əldə etmişik. Hər il azərbaycanlı tələbələrin Qazaxıstanda təhsil alması üçün 12 tam təqaüd təqdim edirik. Elm və təhsil sahəsində iki ölkə arasında imzalanan yeni saziş mübadilə, birgə elmi tədqiqatlar və nəşrləri özündə ehtiva edir.
AZƏRTAC xəbər verir ki, bu fikirləri jurnalistlərə müsahibəsində Qazaxıstanın elm və ali təhsil naziri Sayasat Nurbek deyib. O bildirib ki, hazırda Qazaxıstanda 222 nəfər Azərbaycan vətəndaşı təhsil alır: “Azərbaycanda isə təxminən 80 qazaxıstanlı tələbə təhsil alır. Bizim hədəflərimiz arasında ilk olaraq tələbə mübadiləsi dayanır. Qazaxıstanda hazırda çox sayda xarici universitetin filialları açılır. Britaniya, fransız, alman, italyan, Amerika və Çin universitetlərinin ümumilikdə təxminən 37 filialı fəaliyyət göstərir. Bakıda keçirilən təhsil sərgisində isə 22 universitetimiz bütün tərəfdaşları ilə birgə təmsil olunur. Ümid edirik ki, azərbaycanlı tələbələrdən böyük maraq olacaq və onlar bizdə təhsil almaq üçün müraciət edəcəklər. Xüsusilə, hər il Qazaxıstan hökuməti xarici tələbələr üçün ümumilikdə 550 tam təqaüd ayırır”.
Sayasat Nurbek Azərbaycanın Elm və Təhsil Nazirliyi ilə birgə elmi qrant proqramının yaradılmasını müzakirə etdiklərini qeyd edib: “Bu proqrama hər iki ölkənin alimləri birgə tədqiqatlar aparmaq üçün müraciət edə bilərlər. Qrant proqramının idarə edilməsi və maliyyə vəsaitlərinin ayrılması Qazaxıstan Elm Fondu tərəfindən həyata keçiriləcək.
Bir çox mühüm aspektlərdən biri isə Qarabağ Universitetinə dəstək verməkdir. Biz bu münasibətləri sadəcə strateji əməkdaşlıq və qardaş ölkə kimi deyil, həm də Türk dünyasının bir hissəsi olaraq qiymətləndiririk. Qarabağ Universitetinə azı 10-15 ən yaxşı müəllim göndərəcəyik. Bu müəllimlər ingilis dilində dərs deyəcək və onlar riyaziyyat, biologiya, kimya, süni intellekt, kompüter mühəndisliyi sahələrində ən yaxşı mütəxəssislərimiz olacaq. Bununla yanaşı, Qarabağda təhsil almaq üçün xüsusi təqaüd proqramı yaratmaq üzərində işləyirik. Bu proqramla regionumuzdan olan tələbələr Qarabağda təhsil ala biləcəklər”.
