Fevralın 10-da Azərbaycan Milli Elmlər Akademiyasının (AMEA) Rəyasət Heyəti və AMEA Qadınlar Şurasının birgə təşkilatçılığı ilə 11 Fevral – “Qadınlar və qızlar elmdə” Beynəlxalq Gününə həsr olunmuş “STEM sahəsində karyera imkanlarının üzə çıxarılması: elmdə qadının səsi” mövzusunda konfrans keçirilib.
AZƏRTAC xəbər verir ki, tədbirin məqsədi qadınların elmdəki rolunun artırılmasına diqqət çəkmək, STEM sahəsində karyera imkanlarının genişləndirilməsi və gənc qadın alimlərin motivasiyasına dəstək göstərmək olub.
Konfransı açan AMEA-nın vitse-prezidenti, Elm və Təhsil Nazirliyi Molekulyar Biologiya və Biotexnologiyalar İnstitutunun baş direktoru akademik İradə Hüseynova “Qadınlar və qızlar elmdə” Beynəlxalq Gününün qeyd olunmasının əhəmiyyətinə diqqət çəkib. Qeyd edib ki, bu əlamətdar günün qeyd edilməsinin məqsədi qadınların elmi uğurlarını tanıtmaq və onları daha fəal elm sahəsinə təşviq etməkdir.
Daha sonra məruzəçilər müxtəlif mövzularda çıxış ediblər. Çıxışlar zamanı alimlər elmi nailiyyətlərin qadınların həyatına və cəmiyyətə təsirini vurğulayıb, STEM sahəsində qadınların daha geniş imkanlara malik olmasının vacibliyini qeyd ediblər.
Tədbirdə, həmçinin qadınların elmdəki rolunu artırmaq üçün müxtəlif təşəbbüslər və layihələr müzakirə edilib. Alimlər qeyd ediblər ki, STEM (elm, texnologiya, mühəndislik və riyaziyyat) sahələrində qadınların iştirakı daha çox olarsa, bu, yalnız qadınların özlərinə deyil, bütövlükdə cəmiyyətə müsbət təsir göstərəcək. Eyni zamanda, elmdə qadınların uğurlarının təbliğ edilməsi və onlara daha çox dəstək verilməsi üçün müxtəlif proqramların tətbiqinin zəruriliyi vurğulanıb.
Konfransda çıxış edən alimlər STEM sahəsində çalışan qadınların qarşılaşdığı çətinliklər və maneələrdən danışaraq onlara bərabər imkanların yaradılmasının vacibliyini qeyd ediblər. Həmçinin gənc qadın alimlərin elmi fəaliyyətə cəlb edilməsi, onların motivasiyasının artırılması və karyera inkişafına dəstək verilməsi məsələləri müzakirə olunub.
Tədbir elmdə qadınların daha böyük yer tutması, elmi sahələrdə bərabərliyin təmin edilməsi və yeni nəsil alimlərin təşviqi baxımından mühüm əhəmiyyət kəsb edir.
jpg_1765410473.jpg)
jpg_1765188547.jpg)
