Psixologiya Elmi-Tədqiqat İnstitutu tərəfindən həyata keçirilmiş növbəti fundamental elmi tədqiqat beynəlxalq səviyyədə uğurla təqdim olunub. İnstitutun tədqiqatçıları tərəfindən hazırlanan “Generalizə olunmuş təşviş pozuntusu şkalasının Azərbaycan dilinə adaptasiyası: onun rifah, interpersonal dəstək, depressiya və stress ilə əlaqəsi” (Adapting Generalized Anxiety Disorder Scale into Azerbaijani: its Association with Wellbeing, Interpersonal Support, Depression and Stress) adlı elmi məqalə Belarusun nüfuzlu “Psychiatry, Psychotherapy and Clinical Psychology” jurnalında dərc edilib.
Tədqiqat işi AMEA-nın müxbir üzvü, professor Bəxtiyar Əliyev, institutun elmi araşdırmalar üzrə baş koordinatoru Ülkər Zalova Nuriyeva, eləcə də tədqiqat qrupunun üzvləri Leyla İsayeva, Lamiyyə Hüseynova, Nəzrinxanım Mehdiyeva və Rahilə Məmmədova tərəfindən hazırlanıb.
Məqalənin çap olunduğu jurnal Scopus bazasında indekslənir, Rusiya Federasiyası və Belarusun Ali Attestasiya Komissiyaları tərəfindən tanınır, həmçinin Ulrich’s Periodicals Directory, EBSCO və CNKI kimi beynəlxalq elmi bazalarda da yer alır.
Yaşı 18-dən yuxarı olan 376 nəfərin (323 qadın, 53 kişi) iştirakı ilə aparılan və məlumatların onlayn sorğu vasitəsilə toplandığı araşdırma nəticəsində GAD-7 şkalasının Azərbaycan dilinə adaptasiyası uğurla həyata keçirilib, alətin psixometrik göstəricilərinin — etibarlılıq və validliyinin yüksək olduğu təsdiqlənib.
Tədqiqatın nəticələri göstərir ki, adaptasiya olunmuş bu şkala təşvişin erkən aşkarlanması və qiymətləndirilməsi üçün həm klinik praktikada, həm də elmi araşdırmalarda etibarlı və effektiv ölçmə vasitəsi kimi istifadə oluna bilər. Eyni zamanda, bu alət psixoloqlar və psixiatrlar tərəfindən gündəlik peşəkar fəaliyyətdə praktik və əlçatan şəkildə tətbiq edilə bilər.
Ümumilikdə, sözügedən tədqiqat Azərbaycan dilində psixometrik alətlərin inkişafına mühüm töhfə verməklə yanaşı, təşviş pozuntularının daha dəqiq qiymətləndirilməsi, onların rifah, sosial dəstək, depressiya və stresslə qarşılıqlı əlaqələrinin dərindən öyrənilməsi baxımından həm elmi, həm də praktik əhəmiyyət daşıyır.
"Azərbaycan"
