Baş nazir II Qaregini dövlət çevrilişinə dəstəkdə ittiham edir
Paşinyan-kilsə qarşıdurması son zamanlar yeni mərhələyə adlayıb. Bu dəfə N.Paşinyan kilsəyə, xüsusilə kilsənin rəhbəri II Qareginə qarşı hücuma keçib. Məsələ ondadır ki, erməni kilsəsi ölkənin siyasi idarəçiliyinə müdaxilə etməyə çalışır, Paşinyan isə buna qarşı çıxır.
N.Paşinyan "Feysbuk" hesabında paylaşıb ki, əgər Ktriç Nersisyan (II Qaregin - red.) Vazgen Qalstanyanın (Baqrat) və Gevorq Acapaxyanın həbsini qanunsuz hesab edirsə, deməli, o, adıçəkilən şəxslərin ideologiyasını və ölkədə hərbi çevriliş etmək, insanları küçələrdə güllələmək, xaos yaratmaq planlarını dəstəkləyir: "Belə olduğu təqdirdə, Vaqarşapatın genişləndirilmiş icmasına daxil olan heç bir ərazi hüquq-mühafizə orqanlarının fəaliyyətindən kənarda qala bilməz. Xüsusilə də ona görə ki, Ktriç və bir neçə digər şəxsin sayəsində həmin ərazilər əxlaqsız davranışlar üçün hələ də əlverişlidir".
Paşinyan artıq bir müddətdir ki, kilsə rəhbərliyini dövlət işlərinə müdaxilədə və siyasi dairələrlə gizli əməkdaşlıqda ittiham edir. Onun fikrincə, Ermənistan Apostol Kilsəsi, xüsusən də hazırkı katolikos cəmiyyətin demokratik inkişafına mane olur və keçmiş hakimiyyətlərlə sıx əlaqədə qalmaqda davam edir.
Ekspertlər bildirirlər ki, Paşinyan bu bəyanatı xalqla kilsə arasındakı münasibətləri sarsıtmaq məqsədilə verib. Xüsusilə gənc nəslin kilsəyə olan münasibətindəki dəyişiklik və dinin siyasi nüfuzunun azalması fonunda bu cür çağırışlar cəmiyyətdə müəyyən dəstək qazana bilər.
"Hraparak" nəşri yazıb ki, bir tərəfdən iqtidar nümayəndələri müxalifətə, kilsəyə və özlərinin siyasi kursuna qarşı çıxanların hamısına qarşı müharibə aparır, digər tərəfdən isə komandadaxili çəkişmələrin pik həddə çatdığı haqda xəbərlər yayılır. Amma səbəb kilsəyə qarşı kampaniya və baş nazirin söyüş dolu statusları deyil, sentyabrda gözlənilən "Vətəndaş Müqaviləsi" partiyasının konfransı, yeni, daha əhatəli idarə heyətinin seçkiləri və 2026-cı il seçkilərindən sonra hökumət vəzifələrinin yenidən bölüşdürülməsi məsələsidir.
Müəllif bildirib ki, bu fonda parlamentin spikeri vəzifəsi üçün güclü rəqabət var. Bunun üçün komandada iddialılar da az deyil: "Tiqran Avinyana qarşı da əks-təbliğat aparılır. Bunun himayədarı Paşinyandır. Paşinyan Avinyanı öz qulluqçuları vasitəsilə idarə heyətindən uzaqlaşdırmağa çalışır və bu, çətin ki, uğur qazansın. Pis imicinə görə reytinqi aşağı olan Suren Papikyanı da istəməyənlərdən ibarət böyük ordu var, amma Paşinyan taxta iddialı olmasın deyə onu kölgədə saxlayır. Bu kontekstdə hakim partiya üzvləri istisna etmirlər ki, yaxın vaxtlarda bəzi tanınmış dövlət məmurları, onların əxlaqsız şəxsi həyatları, sui-istifadələri, korrupsioner sövdələşmələri ilə bağlı gözdən salan informasiyalar meydanlara atılacaq".
Erməni siyasi texnoloq Vigen Hakopyan deyib ki, Samvel Karapetyan faktoru, əslində, indi Erməni Apostol Kilsəsi ətrafında baş verən hadisələrlə birlikdə nəzərdən keçirilir. Onun sözlərinə görə, erməni iş adamı Samvel Karapetyanın qısa müsahibəsindəki ifadələrin heç biri hakimiyyətin iddia etdiyi "çağırış" ifadəsinə uyğun gəlmir.
Hakopyan Erməni Apostol Kilsəsi ətrafında baş verənlərlə paralel olaraq Samvel Karapetyan amilini neytrallaşdırmaqla bağlı Ermənistan hakimiyyətinin davranışlarına da toxunaraq qeyd edib ki, Ermənistanın hazırkı hakimiyyəti Samvel Karapetyan və Erməni Apostol Kilsəsinin birliyindən qorxuya düşüb. Qeyd edib ki, bu birlik hakimiyyət üçün çox təhlükəlidir: "Samvel Karapetyan-Erməni Apostol Kilsəsi birliyi hakimiyyət üçün çox təhlükəlidir, çünki iqtidaryönlü çevrədən kənarda böyük bir seqment üçün danılmaz birlikdir".
Hər halda proseslərin gedişi Hayastanı qarşıdakı dövrdə daha çətin günlərin gözlədiyini göstərir.
Elçin CƏFƏROV,
"Azərbaycan"
jpeg_1765897678.jpeg)
