İqtidar fraksiyasının deputatları baş nazirlə təcili görüş tələb edirlər
Ermənistanda cərəyan edən son hadisələrin təhlili bu ölkədə iqtidara qarşı dərin bir etimadsızlığın hökm sürdüyünü üzə çıxarır. Baş nazir Nikol Paşinyan hər vəchlə hakimiyyətini möhkəmləndirməyə çalışır. Amma ölkənin bütün sahələrində, o cümlədən sosial sferada artan problemlər insanları ciddi çətinliklərlə üzləşdirib.
Digər tərəfdən görünən həm də budur ki, dünənə qədər demokratiya və qanunçuluqdan dəm vuran Paşinyan vəzifəsini qoruyub saxlamaq üçün ən radikal addımlara belə gedir. Məhz belə vəziyyətdə problemlər içində boğulan Hayastan əhalisi yeni hökumətə də etibar etmir.
Bütün bunların fonunda isə Ermənistan baş naziri avtoritar rejimlə hakimiyyətini daha da möhkəmləndirməyə çalışır. Bu barədə "The National Interest"də geniş yayımlanan məqalədə bildirilir ki, sadə ermənilər inqilab yolu ilə hərbi cani Serj Sarkisyanı devirən Paşinyanın "Məxməri inqilabı"na böyük ümidlər bəsləyirlərmiş. Amma son illərdə Ermənistanın demokratik mənzərəsi daha da qaranlıqlaşıb. Hazırda isə yarıtmaz hakimiyyət aktiv şəkildə qeyri-demokratik idarəçiliyə, hətta avtoritarizmə doğru addımlayır.
Məqalədə İrəvanın antidemokratik addımlarına dair tutarlı faktlar da göstərilib. Məsələn, siyasi fəalların və jurnalistlərin təqib olunması indi daha çox narahatlıq doğurur. Bu faktlar hətta demokratik təsisatların fəaliyyətinin qiymətləndirilməsi üzrə ixtisaslaşmış bir sıra QHT-lərin illik hesabatlarında da öz əksini tapır.
Bütün bunların fonunda Ermənistanın hakim "Vətəndaş Müqaviləsi" partiyasının deputatları baş nazir Nikol Paşinyanla görüşü ümidlə gözləyirlər. "Joğovurd" nəşrinin yaydığı xəbərə görə, iqtidar fraksiyasının deputatları Paşinyanla görüşün təşkil olunması üçün rəhbərliyə müraciət ediblər. Baxmayaraq ki, fraksiya üzvləri zahirən hər şeyin qaydasında olduğunu, ölkənin sakit və firavan yaşam tərzini göstərməyə çalışır, Paşinyan ölkədə həyatın aktiv olduğunu vurğulayır, lakin yenə də deputatların daxili narahatlıqları və açıq qalan sualları var: "Avropa İttifaqına (Aİ) üzvlük məsələsi də havadan asılı vəziyyətdə qalıb. Paşinyan əvvəlcə referendum olmayacağını, Ermənistanın Aİ-yə yalnız onların icazə verdiyi qədər yaxınlaşacağını bildirmişdi. İndi isə tamamilə əksinə, hökumət iclasında bu məsələni müzakirə edir və bildirir ki, Ermənistanın Avropa gələcəyini 50 min imza toplayan xalq müəyyənləşdirəcək".
Məhz bu məsələləri və daxili müzakirələri aydınlaşdırmaq üçün fraksiyanın deputatları Paşinyanla görüşmək istəyirlər. Amma bu görüşün nə vaxt baş tutacağı, Paşinyanın parlamentə nə zaman gələcəyi hələ bəlli deyil. Deputatlar fraksiya rəhbərinin cavabını gözləyirlər.
Bu arada o da vurğulanır ki, Aİ-yə üzvlük layihəsinə dəstək verilməsindən sonra Rusiyadan gələn təhdidlər Nikol Paşinyanı narahat edib. Bildirilir ki, Paşinyan icra və qanunvericilik orqanlarının rəsmilərinin iştirakı ilə İcevan şəhərində müzakirələr təşkil edib. Bu müzakirələrdə Ermənistan iqtisadiyyatına gözlənilən ağır təsirlərin qarşısını almaq yolları təklif olunub. Lakin baş nazir bildirib ki, Aİ layihəsindən geri çəkilmək və onu qəbul etməkdən imtina etmək mümkün deyil. Ancaq məlum olub ki, bazar ertəsi başlayacaq parlamentin yaz sessiyasının ilk iclasının gündəliyinə Aİ-yə üzvlük layihəsi daxil edilməyib, baxmayaraq ki, bu layihə keçən ilin sonundan parlamentə təqdim edilib.
Hakimiyyət fraksiyasında isə deputatların böyük bir hissəsi bu layihənin qəbuluna qarşı çıxır. Onlar bunu "təhlükəli nəticələri olan macəra" adlandırırlar. Layihənin mətni "Vətəndaş Müqaviləsi" fraksiyasında istehza mövzusu olub. Fraksiya üzvləri Avropaya tələsənlərin savadsızlıq və sadəlövhlük səviyyəsindən heyrətləndiklərini bildirirlər.
Elçin CƏFƏROV,
"Azərbaycan"
