Ödəmə terminalları niyə yoxa çıxıb?

Avtobus dayanacaqlarının əksəriyyətindən "MilliÖn" ödəmə aparatlarının yığışdırılması sərnişinlərin narazılığına səbəb olub

Son vaxtlar paytaxtın avtobus dayanacaqlarında "BakıKart"ların balansının artırılması üçün nəzərdə tutulan ödəniş terminallarına, demək olar ki, rast gəlinmir. Bir-iki ay əvvələ qədər dayanacaqlarda mövcud olan terminalların bir çoxu  yığışdırılıb. 
Bu vəziyyət isə ictimai nəqliyyatdan istifadə edən vətəndaşların narahatlığına və narazılığına səbəb olub. Çünki dayanacaqlarda karta gediş haqqı vura bilməyən vətəndaşlar  kimdənsə onun əvəzinə pul ödəməyi xahiş etmək məcburiyyətində qalırlar. Ya da  müəyyən məsafə qət edərək metro stansiyalarına, terminalların olduğu başqa ünvanlara üz tuturlar. 
Bəs bu vəziyyətin yaranma səbəbi nədir? Vətəndaşları narahat edən məsələ ilə bağlı kiçik araşdırma apardıq. 

"Terminallara zərər verildiyi üçün yığışdırılıb"

"BakıKart"a ödənişlərin edilməsi iki sistemlə - "BakıKart" satış və yükləmə aparatlarında, həmçinin "MilliÖn" ödəmə terminalları vasitəsilə mümkündür. Hazırda "BakıKart" yükləmə aparatları əsasən metro stansiyalarda quraşdırılıb. Avtobus dayanacaqlarında isə "MilliÖn" terminalları ilə sərnişinlər kartlarının balansını artırırlar. O da həmin terminalları tapa bilsələr...
 "BakıKart"ın rəhbəri Orxan Bayramov yükləmə aparatları ilə bağlı sualımıza cavabında bildirdi ki, hazırda "BakıKart" sisteminə inteqrasiya olunan 1350 "MilliÖn" ödəmə terminalları mövcuddur. Terminallar olmayan dayanacaqların yaxınlığındakı marketlərdə də ödəmə aparatları qoyulub. O.Bayramov ödəniş terminallarının sayının artırılıb-artırılmayacağı məsələsi ilə bağlı isə Bakıda bu istiqamətdə təkmilləşdirmə işlərinin aparıldığını vurğuladı. 
"MilliÖn" şirkətindən isə qəzetimizə bildirdilər ki, müvafiq ərazilərdən yığışdırılan terminallara zərər verildiyi üçün bu addım atılıb. Qeyd edildi ki, qoyulan terminallar vaxtaşırı sındırıldığına, oğurlandığına, yararsız hala salındığına görə əvvəllər yerləşdirildiyi dayanacaq məntəqələrindən götürülüb. Beləliklə də, onların sayı azalıb. 
Görünən odur ki, aidiyyəti qurumlar məsələnin həllini alternativ yollarda yox, birbaşa aparatları dayanacaqlardan götürməkdə görüblər. 

Onlayn ödənişlərdə də bəzi çətinliklər mövcuddur

Burada bir məsələ də diqqət çəkdi. Ödəniş terminallarından əlavə kartların balansını "online.bakikart.az" saytına daxil olmaqla da artırmaq mümkündür. Bunun üçün əvvəlcə portala daxil olub e-mail və yaxud telefon nömrəsi ilə qeydiyyatdan keçib şəxsi kabinet yaratmaq lazımdır. Şəxsi kabinet yaratdıqdan sonra "BakıKart"ın nömrəsini və bank kartının məlumatlarını əlavə edərək ödəniş həyata keçirmək olar. 
Kart balansı 2 üsulla - birbaşa və ya kartın şəxsi kabinetə əlavə edilməsi ilə artırıla bilər. Əgər kart kabinetə əlavə edilərsə, daha operativ ödəniş etmək imkanı yaranacaq. Ödənilən məbləğ kartın balansına bir saat ərzində oturur.
Növbəti neqativ bir hal da elə burada baş verir. Belə ki, kartın balansının onlayn artırıldığı zaman məbləğin karta dərhal yüklənməməsi vətəndaşlar arasında narazılığa səbəb olur. Çünki belə vəziyyətdə sərnişin dayanacağa yaxınlaşıb kartının balansını  yerindəcə artırmaq istəyərsə, dəqiqələrlə dayanıb balansa pulun yüklənməsini gözləmək məcburiyyətində qalacaq. Eyni zamanda şəxsi kabinetdə kartın balansındakı məbləğ də göstərilmir. Bu kimi hallara görə "BakıKart"a onlayn pul yüklənilməsi heç də əlverişli hal kimi qiymətləndirilmir. Çünki nəqliyyat vasitəsi vətəndaşı gözləmir.
Bu məqamla bağlı suala cavabında isə Orxan Bayramov portaldakı vəziyyətin texniki məsələ olduğunu söyləyərək məsələyə dəqiq cavab verə bilməyəcəyini bildirdi. 
Bir sözlə, məsələ ilə bağlı hər iki aidiyyəti qurumdan hazırkı vəziyyətin aradan qaldırılması üçün görüləcək işlərlə bağlı cavab almağa çalışsaq da, təəssüf ki, cəmiyyəti maraqlandıran məqamlara aydınlıq gətirilmədi. Belə görünür ki, hər kəs bu günün "nadir tapıntısı" olan ödəmə terminallarından əlini üzməlidir. Əks halda sərnişin gününü yükləmə aparatlarının axtarışına çıxmaqla keçirməli olacaq... 

Aydan XƏLİLOVA,
"Azərbaycan"