Bugün Yeni Azərbaycan Partiyası Xətai rayon təşkilatında Xətai rayonunun şəhidlərinə həsr olunmuş “Əbədi Qəhrəmanlar” adlı kitabın təqdimat mərasimi keçirilib. Tədbirdə Xətai rayonu ictimaiyyəti, İcra Hakimiyyəti, Milli Məclisin deputatları, Ağsaqqallar Şurası, şəhid ailələri və yaxınları iştirak ediblər.
Tədbiri giriş sözləri ilə açan YAP Xətai rayon təşkilatının sədri Ramil Mirzəyev şəhidlərimizə dövlət qayğısından və onların qəhrəmanlığını əbədiləşdirəcek belə layihələrin əhəmiyyətindən söz açıb. Bu xüsusda, şəhidlərimizin fədakarlığını, onların vətən sevgisini və şücaiyyətlərini gələcək nəsillərə çatdıracaq materialların hazırlanmasını alqışlayıb.
Çıxış edən Xətai rayonu İcra Hakimiyyətinin başçısı Rafiq Quluyev Azərbaycan oğullarının şücaəti və qəhrəmanlığı və Ali Baş Komandanın uğurlu hərbi rəhbərliyi nəticəsində torpaqlarımızın işğaldan azad edildiyini bildirib və şəhidlərimizin bu fədakarlığının Azərbaycan xalqının yaddaşında əbədi qalacağını vurğulayıb.
Daha sonra çıxış edən Milli Məclisin deputatı Vüqar Rəhimzadə şəhidlərimizin əmanəti olan ailələrinə dövlət qayğısından bəhs edib. O, bildirib ki, ölkə mediası şəhidlərimizi diqqətdə saxlamaqla onların əziz xatirəsinin daim yad edilməsinə töhfə verir.
Milli Məclisin deputatı Pərvanə Vəliyeva isə kitab haqqında məlumat verərək bildirib ki, “Əbədi Qəhrəmanlar” kitabında 2016-cı il Aprel döyüşlərində, 2020-ci il Tovuz döyüşlərində, 44 günlük Vətən müharibəsində, eləcə də 2021-ci il helikopter qəzasında, 2022-ci ildə Kəlbəcər, Xocalı rayonu ərazisində Ermənistan silahlı qüvvələrinin geniş miqyaslı təxribatının qarşısının alınmasında, 2023-cü il Anti-terror əməliyyatında qəhrəmancasına həlak olan 89 şəhid haqqında məlumatlar yer alır.
Rayon Ağsaqqallar Şurasının sədri, şəhid atası Mürvət Əsgərov, sədr müavini, şəhid atası Meyvəddin Ramaldanov, eləcə də şəhid ailələri kitabın ərsəyə gəlməsində əməyi keçən hər kəsə təşəkkürlərini bildiriblər.
Tədbirdə iştirak edən qonaqlara “Əbədi Qəhrəmanlar” kitabı paylanıb.
Qeyd edək ki, sözügedən kitab Milli Məclisin deputatı Pərvanə Vəliyevanın təşəbbüsü ilə hazırlanmışdır.
