Prezident İlham Əliyevin Naxçıvana səfəri zamanı verdiyi müsahibədə əsas mesajlardan biri muxtar respublikanın gələcək nəqliyyat imkanları ilə bağlı idi. Prezidentin açıqlamalarından aydın görünür ki, məqsəd yalnız Azərbaycanın əsas hissəsi ilə Naxçıvan arasında quru bağlantısını bərpa etmək deyil. Daha böyük strateji hədəf Naxçıvanı regional və beynəlxalq nəqliyyat sisteminin mühüm qovşaqlarından birinə çevirməkdir.
Bu sözləri AZƏRTAC-a açıqlamasında Milli Məclisin deputatı Azər Kərimli söyləyib.
O bildirib ki, 2020-ci il Vətən müharibəsində qazanılmış Zəfər regionda yeni geosiyasi reallıq yaratmaqla yanaşı, Naxçıvanın uzun illər məhdudlaşdırılmış tranzit potensialının reallaşdırılması üçün də tarixi imkan açdı. Zəngəzur bağlantısının yaradılması bu baxımdan Azərbaycanın yalnız milli deyil, daha geniş regional maraqlara xidmət edən təşəbbüsüdür.
Azərbaycan bu istiqamətdə siyasi bəyanatlarla kifayətlənməyib. Müharibədən dərhal sonra Horadiz-Ağbənd avtomobil və dəmir yollarının tikintisinə başlanması, Naxçıvanda dəmir yolu infrastrukturunun yenidən qurulması ölkəmizin öz üzərinə düşən işi ardıcıl şəkildə həyata keçirdiyini göstərir. Prezident İlham Əliyevin vurğuladığı kimi, “Azərbaycan ərazisində işlərin böyük hissəsi artıq görülüb”.
"Naxçıvan dəmir yolunun gələcək yükdaşıma imkanları isə məsələnin miqyasını daha aydın göstərir. Yeni infrastrukturun ən azı 15 milyon ton yükün daşınmasına hesablanması Naxçıvanın, sadəcə, daxili nəqliyyat bağlantısı deyil, beynəlxalq tranzit xəttinin mühüm hissəsinə çevriləcəyindən xəbər verir. Dövlətimizin başçısının sözləri ilə desək, “15 milyon tonluq yeni bir dəhlizin açılması həm ölkələrimiz, həm də geniş coğrafiya üçün böyük önəm daşıyır”.
Burada əsas üstünlük Naxçıvanın coğrafi mövqeyidir. Zəngəzur bağlantısı Şərq-Qərb nəqliyyat dəhlizinin yeni və mühüm qoluna çevrilə, eyni zamanda, Şimal-Cənub marşrutu ilə əlaqələnə bilər. Türkiyənin Qars-Naxçıvan dəmir yolunun tikintisinə başlaması isə bu sistemin beynəlxalq miqyasını daha da genişləndirir. Prezident İlham Əliyevin qeyd etdiyi kimi, “bu layihələrin uzlaşdırılması, koordinasiya şəklində icra edilməsi yeni bir önəmli beynəlxalq dəhliz açacaq”.
Belə bir nəqliyyat şəbəkəsinin iqtisadi təsiri yalnız tranzit gəlirləri ilə məhdudlaşmayacaq. Yük axınlarının artması logistika mərkəzlərinin, anbar komplekslərinin, xidmət və istehsal müəssisələrinin yaradılmasını, sahibkarlığın genişlənməsini və yeni iş yerlərinin açılmasını stimullaşdıracaq. Azərbaycanın yanaşması da məhz tranzit ölkəsi olmaqdan daha genişdir. Prezident daha əvvəl Orta Dəhliz barədə danışarkən vurğulamışdı ki, Azərbaycanın mövqeyi “sadəcə, tranzit ölkəsi olmaq və tranzitdən ödənişlər almaqdan ibarət deyil”. Məqsəd nəqliyyat imkanlarını real iqtisadi fəaliyyətə və özəl sektor üçün yeni fürsətlərə çevirməkdir.
Bu perspektiv Naxçıvanın enerji potensialı ilə birləşdikdə daha böyük əhəmiyyət qazanır. Yeni generasiya gücləri, Günəş və su elektrik stansiyaları, gələcək enerji ixracı imkanları nəqliyyat, energetika və istehsalın vahid inkişaf modelinin tərkib hissələrinə çevrildiyini göstərir", - deyə A.Kərimli vurğulayıb.
Deputat əlavə edib ki, Naxçıvana açılan yeni yollar, sadəcə, coğrafi təcridin aradan qaldırılması demək deyil. Söhbət muxtar respublikanın iqtisadi və geostrateji funksiyasının dəyişməsindən gedir. Vaxtilə Naxçıvanın imkanlarını məhdudlaşdıran coğrafiya indi onun ən böyük üstünlüklərindən birinə çevrilir.
Prezident İlham Əliyevin ifadə etdiyi yanaşmanın mahiyyəti də bundan ibarətdir, Azərbaycan öz maraqlarını təmin etməklə yanaşı, dünya üçün yeni nəqliyyat yollarını təqdim edir. Naxçıvan isə bu yeni nəqliyyat arxitekturasında Şərqlə Qərbi, Şimalla Cənubu birləşdirən mühüm iqtisadi və tranzit qovşaqlarından biri olmaq üçün yeni inkişaf mərhələsinə qədəm qoyur.
