İmmunitet sistemi orqanizmi virus, bakteriya və digər zərərli mikroorqanizmlərdən qoruyan mürəkkəb müdafiə mexanizmidir və onun zəifliyi həm tibbi müayinələrlə, həm də gündəlik həyatda müşahidə olunan bəzi əlamətlərlə özünü göstərə bilər.
AZƏRTAC xəbər verir ki, bunu Səhiyyə Nazirliyinin rəsmi instaqram hesabındakı canlı yayım zamanı Səhiyyə Nazirliyinin mütəxəssis eksperti, terapevt Zakir Quliyev bildirib.
Onun sözlərinə görə, immunitetin zəif olub-olmadığını dəqiq bilmək üçün qan analizləri, ağ qan hüceyrələrinin səviyyəsi, vitamin və mineral göstəriciləri yoxlanılır. “Bundan əlavə, insan özündə tez-tez xəstələnmə, infeksiyaların ağır və uzunmüddətli keçməsi kimi hallar müşahidə edirsə, bu artıq immun sisteminin kifayət qədər güclü işləmədiyini göstərə bilər. Soyuqdəymə, qrip, boğazağrısı kimi xəstəliklərin tez-tez təkrarlanması, bədənin əvvəlki kimi tez toparlanmaması, uzun müddət davam edən halsızlıq və enerji çatışmazlığı immunitetin zəifləməsinin əlamətlərindəndir”,- deyə Z.Quliyev vurğulayıb.
Mütəxəssis-ekspert bildirib ki, dodaq uçuğunun tez-tez çıxması, ağızda aftalar, diş əti problemləri, dəridə yaranan infeksiyaların və kiçik yaraların gec sağalması da bədənin müdafiə qabiliyyətinin azaldığını göstərə bilər. “Bununla yanaşı, həzm sistemində pozğunluqlar, tez-tez ishal, şişkinlik, iştahasızlıq, stresə qarşı həssaslıq, yuxu pozuntuları və ümumi psixoloji gərginlik də immun sisteminin zəifliyi ilə əlaqəli ola bilər. Belə əlamətlər uzun müddət davam edərsə və insanın gündəlik həyat keyfiyyətini aşağı salarsa, səbəbi aydınlaşdırmaq və mümkün ciddi problemlərin qarşısını almaq üçün həkimə müraciət etmək vacibdir”, - deyə o diqqətə çatdırıb.
jpg_1767211798.jpg)
