Aqrar Xidmətlər Agentliyi Təlim Mərkəzinin təşkilatçılığı ilə Astaranın Ərçivan qəsəbəsində fermer Fətulla Əliyevin 4 hektarlıq intensiv meyvə bağında "Aqrar sahədə müasir suvarma sistemlərinin təşviqi" mövzusunda maarifləndirici sahə görüşü keçirilib.
Müasir damcı suvarma sistemi ilə təchiz olunmuş bağda sitrus meyvələri və digər subtropik bitkilər becərilir. Belə bir təsərrüfatın ünvan seçildiyi görüşün əsas məqsədi təlim iştirakçılarının müasir suvarma texnologiyaları ilə bağlı əldə etdikləri nəzəri biliklərin praktiki nümunələr əsasında möhkəmləndirilməsi, habelə innovativ suvarmada texniki imkanların nümayiş etdirilməsi və qabaqcıl təcrübələrin öyrənilməsi idi.
Görüşdə beynəlxalq ekspert də iştirak edib. Türkiyədən dəvət olunmuş beynəlxalq ekspert Dr. Abdullah İlker Esinin iştirakı ilə keçirilən görüşdə praktiki təqdimat zamanı müasir suvarma sistemlərinin layihələndirilməsi, texniki hesablamaların aparılması, quraşdırılma mərhələləri, istismar qaydaları və texniki xidmətin təşkili ilə bağlı mühüm məqamlar iştirakçılara bilavasitə nümayiş olunub. Həmçinin su ehtiyatlarından səmərəli istifadə, su itkilərinin minimuma endirilməsi və aqrar istehsalda dayanıqlı su idarəçiliyinin təmin olunması istiqamətində qabaqcıl təcrübələr iştirakçıların diqqətinə çatdırılıb. Qeyd olunub ki, avadanlıqların düzgün seçilməsi, quraşdırılması və idarə edilməsi mühüm məsələlərdəndir. Eləcə də suvarma proseslərinin avtomatlaşdırılması və "ağıllı idarəetmə texnologiyaları"nın təsərrüfatlarda tətbiqi imkanları nəzərdən keçirilib.
Təlim proqramına həmçinin TOT (Training of Trainers) sessiyaları daxil edilib. Sessiyalar zamanı müasir suvarma sistemləri sahəsində yerli və beynəlxalq təcrübə müzakirə olunub, müxtəlif ölkələrin uğurlu təcrübələrinin yerli şəraitdə tətbiqi tövsiyə edilib.
Aqrar Təlim Mərkəzi tərəfindən müxtəlif bölgələrdə təşkil olunan bu cür təlim proqramları dövlət-özəl sektor əməkdaşlığı, beynəlxalq tərəfdaşlarla birgə həyata keçirilən təşəbbüslər, xarici ekspert və mütəxəssislərin iştirakı, eləcə də qabaqcıl beynəlxalq təcrübənin tətbiqi vasitəsilə aqrar sahədə bilik və bacarıqların inkişafına, innovativ yanaşmaların təşviqinə və fermerlərin peşəkar potensialının gücləndirilməsinə xidmət edir.
Sahə görüşü zamanı iştirakçılara müasir suvarma sistemləri, onların müxtəlif təsərrüfat sahələrində tətbiq xüsusiyyətləri, suvarma proseslərinin düzgün təşkili və onlardan səmərəli istifadə edilməsi ilə bağlı ətraflı məlumat verilib, "ağıllı suvarma sistemləri"nin iş prinsipləri əyani nümayiş olunub.
S.QUBADOĞLU,
"Azərbaycan"
