Şəhər statusu almasının 76 illiyi münasibətilə Mingəçevirdə silsilə tədbirlər keçirilib. Tədbir Ulu Öndər Heydər Əliyevin abidəsini ziyarətlə başlayıb.
Sonra Heydər Əliyev prospektində yerləşən iki xiyabanın yenidən qurulmasından sonra açılışları olub. 1 hektar ərazisi olan xiyabanda sakinlərin istirahəti üçün hər cür şərait yaradılıb - yeni oturacaqlar qoyulub, kölgəliklər təmir olunub, fəvvarə yenidən inşa edilib, velosiped xətti salınıb, tamet plitələr döşənib, müasir işıqlandırma sistemi, idman qurğuları, attraksionlar quraşdırılıb. Dama, nərd və şahmat oyunları üçün də sahə yaradılıb. Həmçinin yaşıllıq zolaqları genişləndirilib, həmişəyaşıl ağac tingləri, dekorativ gül kolları əkilib.
Şəhər Bələdiyyəsinin maliyyə dəstəyi ilə yenidən qurulan digər xiyabanda görülən işlər də gözoxşayır. Burada da yaşıllıq zolaqları artırılaraq 2000-ə yaxın rəngarəng dekorativ gül kolları və həmişəyaşıl ağac tingləri əkilib, oturacaqlar və kölgəliklər təmir edilib, xiyabanın piyada zolağının hər iki tərəfinə təbii ot örtüyü döşənib, uşaqların əylənməsi üçün müxtəlif heyvan və quş heykəlləri qoyulub və başqa işlər görülüb.
İctimaiyyət nümayəndələri qarşısında çıxış edən şəhər icra hakimiyyətinin başçısı İlham İsmayılov "Şəhər günü" münasibətilə sakinləri təbrik edib, Mingəçevirin abadlaşmasında, yenilənməsində xidmətləri olan hər kəsə minnətdarlığını bildirib. Şəhərin ilk qurucularını xatırlayan, Ulu Öndər Heydər Əliyevin Mingəçevirin inkişafındakı xidmətlərindən danışan ŞİH-in başçısı Prezident İlham Əliyevin şəhərə göstərdiyi diqqət və qayğıdan söz açıb.
Tədbirin ikinci hissəsi axşam saatlarında Mingəçevir Dövlət Dram Teatrında davam edib. Ümummilli Lider Heydər Əliyevin və şəhidlərin xatirəsi anıldıqdan və Dövlət Himni səsləndirildikdən sonra çıxış edən ŞİH-in başçısı Mingəçevirin yaranma tarixindən, ilk quruculuq illərindən, şəhərin pillə-pillə yüksəlməsindən, genişlənməsindən danışıb. Şəhərin müasir dövrdəki inkişaf mərhələsindən söz açan İ.İsmayılov Prezident İlham Əliyevin bilavasitə göstərişi ilə həyata keçirilən tədbirlərə toxunaraq bildirib ki, Mingəçevirdə sakinlərin arzu və istəyinə uyğun yeni park və xiyabanlar yaradılır, məhəllələr abadlaşır, nümunəvi istirahət məskənləri, idman meydançaları salınır, yaşıllıq zolaqları genişlənir.
Sonra Milli Məclisin deputatı Aydın Mirzəzadə çıxış edərək həmyerlilərini təbrik edib, onlara xoş arzularını çatdırıb.
Mingəçevirin inkişafındakı xidmətlərinə görə bir qrup şəxsə ŞİH-in Fəxri fərmanları təqdim olunduqdan sonra şəhərin incəsənət ustaları konsert proqramı ilə çıxış ediblər.
Lazım QULİYEV,
"Azərbaycan"
