Özbək nümayəndə heyəti olaraq, biz buraya Özbəkistanda, Səmərqənddə hazırladığımız bəyanatımızı səkkiz ölkədən olan gənclərin iştirakı ilə imzalamaq üçün gəldik. Bunlar - Orta Asiya ölkələri, Azərbaycan, Türkiyə və Macarıstandır. Bu bəyanatı hazırladıqdan sonra COP29-da iştirak etmək üçün Bakıya gəldik ki, bu ölkələrin nazirləri də həmin sənədi imzalasınlar.
Bu barədə AZƏRTAC-a Özbəkistandan olan COP29 iştirakçısı Nazokat Kalnazarova məlumat verib.
“Noyabrın 12-də COP29 çərçivəsində Azərbaycan, Özbəkistan, Qırğızıstan və Türkiyədən birinci xanımların iştirak etdiyi tədbir keçirildi. Orada təqdimatımızı nümayiş etdirdikdən sonra həmin ölkələrin nazirləri bəyanatımızı imzaladılar. İndi bu hərəkətlərin hamısı, bəyanatımızda yazdığımız bütün təkliflər həmin səkkiz ölkədə də işlənib hazırlanacaq. Ümid edirəm ki, Braziliyada keçiriləcək növbəti COP sammitində biz hamımız bu il ərzində öz fəaliyyətimizi və səylərimizi müzakirə etmək üçün yenidən bir araya gələcəyik”, -deyə özbəkistanlı iştirakçı əlavə edib.
İqlim dəyişikliyi ilə bağlı problemlərin fəal şəkildə təbliğində və həllində gənclərin mühüm rolunu qeyd edən Nazokat Kalnazarova bildirib ki, COP29 bunun üçün əvəzsiz platformadır. O vurğulayıb: “Ümumiyyətlə, hesab edirəm ki, gənclər bu məsələlərdə çox fəal olmalıdırlar. İqlim dəyişikliyi ilə mübarizə üçün gənclərin təşəbbüs və fəaliyyətlərinə böyük ehtiyac var. Gənclərin səsi eşidilməlidir, çünki biz iqlim dəyişikliyinin nəticələri baxımından ən həssas kateqoriyayıq. Ona görə ki, məsələn, 30 ildən sonra bəlkə də indiki liderlər olmayacaq və ola bilər ki, lider biz olacağıq. Sonra özümüz də bu problemlərlə üzləşəcəyik. Ona görə də gənclərin səsi çox önəmlidir. COP29-da bunun üçün hər cür şərait yaradılıb”.
