Neftçalada 2016-cı ilin aprel ayında şəhid olan Milli Qəhrəman Samid Gülağa oğlu İmanovun 45 illik yubileyi və anım günü qeyd olunub. Tədbir iştirakçıları Samid İmanovun və şəhid olan digər hərbi qulluqçuların məzarlarını ziyarət ediblər, önlərinə gül dəstələri düzüblər və ruhlarını ehtiramla yad ediblər.
Heydər Əliyev Mərkəzində davam edən tədbirdə Milli Qəhrəmanın şəxsi əşyalarından və eksponatlardan ibarət sərgiyə baxış keçirilib, şərəfli ömrü və döyüş yolu ilə bağlı məlumat verilib.
RİH-in başçısı M.Seyidov çıxışında bildirib ki, 2016-cı ilin Aprel döyüşləri Azərbaycanın hərb tarixində mühüm mərhələ olmaqla yanaşı, böyük Zəfərə aparan yolun başlanğıcı olub: "Həmin döyüşlər zamanı Azərbaycan Ordusu yüksək döyüş hazırlığı, peşəkarlıq və qəhrəmanlıq nümayiş etdirərək mühüm strateji mövqeləri azad etdi. Aprel döyüşlərində Azərbaycan Ordusunun gücü və döyüş ruhu bir daha təsdiqləndi. Bu uğurun davamı olan 44 günlük Vətən müharibəsi Azərbaycanın Zəfəri ilə başa çatdı. Ölkəmizin ərazi bütövlüyü bərpa olundu və şəhidlərimizin qanı yerdə qalmadı".
Tədbirdə çıxış edən Milli Məclisin deputatı Tənzilə Rüstəmxanlı, Milli Qəhrəman Samid İmanovun anası Xuraman İmanova, həyat yoldaşı Badam İmanova, Vətən Müharibəsi Qəhrəmanı şəhid Camal İsmayılovun anası Filarə İsmayılova və başqaları Samid İmanovun Vətənə sonsuz sədaqəti, peşəkarlığı və yüksək mənəvi keyfiyyətləri ilə hər zaman seçilən hərbçilərdən biri olmasını, xidmət etdiyi müddətdə üzərinə düşən bütün tapşırıqları layiqincə yerinə yetirdiyini, döyüş yoldaşları arasında böyük hörmət və nüfuz qazandığını bildiriblər. Qeyd edək ki, şəhid Samid Gülağa oğlu İmanov 14 oktyabr 1981-ci ildə Neftçalanın Həsənabad qəsəbəsində anadan olub. 2016-cı il aprel ayının 3-dən 4-nə keçən gecə təmas xəttində başlanan döyüşlər zamanı böyük şücaət göstərib və qəhrəmancasına şəhid olub. Aprelin 9-da Neftçala şəhər Şəhidlər xiyabanında dəfn olunub.
Mayor Samid İmanov xidməti dövründə "Hərbi xidmətdə fərqlənməyə görə" II və III dərəcəli medalı, "Azərbaycan Silahlı Qüvvələrinin 90 illiyi" yubiley medalı, "Qüsursuz xidmətə görə" II və III dərəcəli medalı, "Azərbaycan Silahlı Qüvvələrinin 95 illiyi" yubiley medalı və "Qızıl Ulduz" medalları ilə təltif olunub. Azərbaycan Prezidenti İlham Əliyevin 2016-cı il 19 aprel tarixli sərəncamı ilə ölümündən sonra ona Azərbaycanın Milli Qəhrəmanı adı verilib.
Seyran CAVADOV,
"Azərbaycan"
