"Fransanın Qərbi Afrikada yürütdüyü neoimperializm siyasətinin qarşısı alınmalıdır"
Fransalı siyasətçi, "Vətənpərvərlər" Partiyasının lideri Florian Filippo ölkə prezidenti Emmanuel Makronun Rusiyanı atəşi dayandırmağa məcbur etmək zərurəti ilə bağlı sözlərindən təəccüblənib. O, bu barədə "X" sosial şəbəkəsində yazıb.
Fransa prezidenti öz postunda, Ukrayna müharibəsində atəşkəs əldə etmək üçün Rusiyaya qarşı qəti addımlar atmağa çağırıb. Eyni zamanda Makronun sözlərinə görə, Fransa müttəfiqləri ilə birlikdə bunun üzərində yorulmadan işləyir.
Buna cavabında Filippo hiddətlə yazır: "Bu nə deməkdir?! "Ukraynaya daha çox silah, pul və hətta fransız əsgərləri göndərməklə atəşkəs "tətbiq edin?"
Siyasətçi həmçinin Fransa liderini öz hərəkətləri ilə barışıqda deyil, üçüncü dünya müharibəsini yaxınlaşdırmaqda ittiham edib.
Daha əvvəl Parisdəki Siyasi Araşdırmalar üzrə "Sciences Po" Mərkəzinin analitiki Brüno Kotre demişdi ki, hazırda hər dörd fransızdan yalnız biri Makrona güvənir. Ekspertin fikrincə, seçicilər Fransa liderinin Ukrayna münaqişəsi ilə bağlı qəti addımlar ata biləcəyinə inanmırlar.
Bu arada, Makron daha bir zərbəni İsraildən alıb. Belə ki, İsrailin Baş nazirinin oğlu Yair Netanyahu yazılarında Fransa ərazilərinin müstəqilliyinə çağırıb və Makronun siyasətini Fransanın nasistlərlə tarixi əməkdaşlığı ilə müqayisə edib: "Yeni Kaledoniyanın müstəqilliyinə - HƏ! Fransız Polineziyasının müstəqilliyinə - HƏ! Korsikanın müstəqilliyinə - HƏ! Basklar ölkəsinin müstəqilliyinə - HƏ! Fransız Qvineyasının müstəqilliyinə - HƏ!"
Fransanın Fələstin dövlətini tanımaq planlarına cavab verən Y. Netanyahu Makrona sərt şəkildə "Rədd ol!" deyib.
O həmçinin vurğulayıb ki, Fransanın Qərbi Afrikada yürütdüyü neoimperializm siyasətinin qarşısı alınmalıdır.
İsrailin Baş naziri Benyamin Netanyahu da "X"də buna münasibət bildirib: "Mən ölkənin gələcəyindən narahatlıq keçirən və əsl sionist olan oğlum Yairi sevirəm. Hər bir vətəndaş kimi onun da öz şəxsi fikrini söyləmək hüququ var, baxmayaraq ki, prezident Makronun Fələstin dövlətinin yaradılmasına çağıran tvitlərinə cavab tərzi mənim üçün qəbuledilməzdir".
Baş nazir deyib ki, Makron dəhşətli səhvə yol verir.
Rizvan CƏFƏROV,
"Azərbaycan"
jpg_1745260093.jpg)
